કોલકાતા : ભારતની સંરક્ષણ ક્ષમતાઓને નવી ઊંચાઈએ પહોંચાડવા માટે સંરક્ષણ સંશોધન અને વિકાસ સંગઠન (DRDO) દ્વારા એક મોટો નિર્ણય લેવામાં આવ્યો છે. પશ્ચિમ બંગાળના પૂર્વ મેદનીપુર જિલ્લાના જુનપુટ ખાતે DRDOના નવા મિસાઈલ પરીક્ષણ સુવિધા કેન્દ્રની મંજૂરી મળી ગઈ છે. આ નવું સેન્ટર મુખ્યત્વે ઓડિશાના ચાંદીપુર સ્થિત 'ઇન્ટિગ્રેટેડ ટેસ્ટ રેન્જ' પર સતત વધી રહેલા ટેસ્ટિંગના ભારે દબાણને ઘટાડવા માટે તૈયાર કરવામાં આવી રહ્યું છે, જેથી ભારતની મિસાઈલ ડેવલપમેન્ટ પ્રોસેસને વધુ ઝડપી બનાવી શકાય.

જુનપુટ ભૌગોલિક રીતે ચાંદીપુરથી આશરે ૭૦ કિમી અને દીઘાથી ૪૦ કિમી દૂર બંગાળની ખાડીના કાંઠે આવેલું છે. અહીં ૮.૭૩ એકર જેટલી વિશાળ સમુદ્રી જમીન પર આ સુવિધાસભર કેન્દ્ર વિકસાવવામાં આવશે. આ પ્રોજેક્ટથી બંને કેન્દ્રો વચ્ચે કામની સ્પષ્ટ વહેંચણી થશે; જુનપુટ ખાતે મુખ્યત્વે 'પ્રહાર' જેવી ટૂંકા અંતરની મિસાઈલો અને આધુનિક રડાર સિસ્ટમ્સનું પરીક્ષણ થશે, જ્યારે ચાંદીપુર સેન્ટર 'અગ્નિ' શ્રેણી જેવી લાંબા અંતરની અને વ્યૂહાત્મક બેલિસ્ટિક મિસાઈલો પર ધ્યાન કેન્દ્રિત કરશે.

આ મહત્વકાંક્ષી પ્રોજેક્ટ માટે જરૂરી તમામ પર્યાવરણીય મંજૂરીઓ અને જમીન સંપાદનની કામગીરી પૂર્ણ કરી લેવામાં આવી છે. પરીક્ષણ દરમિયાન સ્થાનિક માછીમારો અને દરિયાકાંઠાના રહેવાસીઓની સુરક્ષાને પ્રાથમિકતા આપીને કામચલાઉ સ્થળાંતર તથા વળતરની યોગ્ય વ્યવસ્થા કરવામાં આવશે. સરહદી સુરક્ષા પડકારોને ધ્યાનમાં રાખીને સમયસર મિસાઈલ પરીક્ષણો પૂરા કરવા માટે આ સેન્ટર અત્યંત મહત્વનું સાબિત થશે. સાથે જ, આ સંરક્ષણ રોકાણથી પશ્ચિમ બંગાળમાં સ્થાનિક રોજગારીની નવી તકો પણ ઊભી થશે.