નવી દિલ્હી:  આંતરરાષ્ટ્રીય નાણાકીય ભંડોળ (IMF) એ ફરી એકવાર ભારતીય અર્થતંત્રની તાકાત પર મહોર લગાવી છે. વિશ્વભરમાં પશ્ચિમ એશિયાના યુદ્ધ અને આર્થિક અસ્થિરતાને કારણે ચિંતાનું વાતાવરણ છે, ત્યારે IMF એ ભારતને વૈશ્વિક વિકાસના મુખ્ય ચાલક બળ (Growth Engine) તરીકે ઓળખાવ્યું છે. IMF ના મુખ્ય અર્થશાસ્ત્રી પિયર ઓલિવિયર ગૌરિનચાસે સ્પષ્ટ કર્યું છે કે ભારતની સ્થિતિ અન્ય મોટી અર્થવ્યવસ્થાઓની સરખામણીએ વધુ સ્થિતિસ્થાપક અને મજબૂત છે.
વિકાસનો આંકડો શું કહે છે?
ગૌરિનચાસે મીડિયા સાથેની વાતચીતમાં જણાવ્યું હતું કે ભારતે ૨૦૨૫માં ૭.૬ ટકાના શાનદાર વૃદ્ધિ દર સાથે અસાધારણ દેખાવ કર્યો હતો. ૨૦૨૬ના વર્ષ માટે પણ અંદાજ પ્રોત્સાહક છે, જેમાં ભારત ૬.૫ ટકાના દરે વિકાસ કરશે તેવી ધારણા છે. જ્યારે વિશ્વની ઘણી અર્થવ્યવસ્થાઓ ધીમા વિસ્તરણ અને આર્થિક સંકોચનનો સામનો કરી રહી છે, ત્યારે ભારતની આ તેજી વૈશ્વિક અર્થતંત્રને ટેકો આપી રહી છે.
મોંઘવારી અને ઉર્જા સંકટનો પડકાર
જોકે, IMF એ સાવચેતીના સુર પણ ઉચ્ચાર્યા છે. પશ્ચિમ એશિયાના સંઘર્ષને કારણે આંતરરાષ્ટ્રીય બજારમાં ક્રૂડ ઓઈલના ભાવ અને ખાદ્યપદાર્થોના ખર્ચમાં વધારો થઈ શકે છે. આ કારણોસર ૨૦૨૬માં ભારતનો ફુગાવો ૪.૭ ટકા સુધી પહોંચવાની શક્યતા છે. ઉર્જાના ઊંચા ભાવ ભારત જેવા આયાત પર નિર્ભર દેશ માટે પડકારજનક સાબિત થઈ શકે છે, તેમ છતાં ભારતની આંતરિક માંગ અને મજબૂત નાણાકીય નીતિ તેને આંચકાઓથી બચાવવામાં સક્ષમ છે.
ભારતની વિશ્વસનીયતામાં વધારો
IMFનું આ મૂલ્યાંકન એવા સમયે આવ્યું છે જ્યારે વૈશ્વિક રોકાણકારો સુરક્ષિત બજારો શોધી રહ્યા છે. ભારતની આર્થિક નીતિઓ અને માળખાગત સુધારાઓને કારણે તે ચીન અને અન્ય યુરોપીય દેશો કરતા વધુ આકર્ષક બની રહ્યું છે. પશ્ચિમ એશિયામાં વધતી અનિશ્ચિતતા વચ્ચે પણ ભારતનું 'સ્થિતિસ્થાપક' રહેવું એ દેશની આર્થિક સાર્વભૌમત્વની મોટી જીત ગણાય છે.