મારગાંવ (ગોવા) : ગોવાના મારગાંવમાં આવેલા પંડિત જવાહરલાલ નહેરુ સ્ટેડિયમમાં આજે રાત્રે ફૂટબોલનો રોમાંચ ચરમસીમાએ હશે. SAFF મહિલા ચેમ્પિયનશિપની બીજી સેમિફાઇનલમાં ભારત અને ભૂટાન વચ્ચે ખરાખરીનો જંગ ખેલાશે. રાત્રે 8 વાગ્યે શરૂ થનારી આ મેચમાં ભારત જીતનો દાવેદાર માનવામાં આવી રહ્યું છે. ગ્રુપ-બીમાં શાનદાર પ્રદર્શન કરી ટોચનું સ્થાન મેળવનાર ભારતીય ટીમે માલદીવ્સ સામે 11-0 ના વિશાળ અંતરથી જીત અને ડિફેન્ડિંગ ચેમ્પિયન બાંગ્લાદેશ સામે 3-0 થી મળેલી પ્રભાવશાળી જીત બાદ સેમિફાઇનલમાં મજબૂત પ્રવેશ કર્યો છે.
મનીષા કલ્યાણની વાપસીથી ભારતીય ટીમનો ઉત્સાહ વધ્યો
આ મહત્વપૂર્ણ મુકાબલા પહેલા ભારત માટે સૌથી મોટા સારા સમાચાર એ છે કે સ્ટાર ફોરવર્ડ મનીષા કલ્યાણ ટીમમાં પરત ફરી છે. પેરુવિયન ક્લબ 'આલિયાન્ઝા લિમા' દ્વારા જૂન ફિફા ઇન્ટરનેશનલ મેચ વિન્ડો માટે તેને રિલીઝ કરવામાં આવતા, ભારતની આક્રમક પંક્તિ હવે વધુ ધારદાર બની છે. તેની હાજરી ભારતીય ખેલાડીઓના મનોબળને ચોક્કસપણે વધારશે.
રેન્કિંગ અને ઇતિહાસમાં ભારતનું પલ્લું ભારે
ફિફા રેન્કિંગ પર નજર કરીએ તો, ભારત 69મા ક્રમે છે, જ્યારે ભૂટાન 164મા ક્રમે છે, જે બંને વચ્ચે લગભગ 100 સ્થાનનો મોટો તફાવત દર્શાવે છે. બંને ટીમો ભૂતકાળમાં માત્ર બે વાર આમને-સામને આવી છે, જેમાં ભારતે બંને મેચ જીતીને કુલ 29-0 નો વિશાળ સ્કોર નોંધાવ્યો છે. જોકે, સેમિફાઇનલનો તણાવ અને ભૂટાનની તૈયારીઓને જોતા, ભારતીય ટીમ કોઈપણ પ્રકારની ગાફલત રાખ્યા વગર મેદાનમાં ઉતરશે. ફાઈનલમાં પ્રવેશ કરવા માટે ભારત આ મેચ જીતવા માટે એડીચોટીનું જોર લગાવશે.