નવી દિલ્હી, તા.૧૭: રાજધાની નવી દિલ્હીના અત્યાધુનિક સંકુલ યશોભૂમિ ખાતે વડાપ્રધાન નરેન્દ્ર મોદીએ સેમિકોન ઇન્ડિયા ૨૦૨૬ ની પાંચમી ભવ્ય આવૃત્તિનું ઉદ્ઘાટન કર્યું છે. આ ત્રણ દિવસીય વૈશ્વિક મહાકુંભમાં દુનિયાભરના ૫૨ દેશોની ૬૦૦ થી વધુ અગ્રણી ટેકનોલોજી કંપનીઓ, દિગ્ગજ રોકાણકારો અને ઉદ્યોગ વિશેષજ્ઞો ભાગ લઈ રહ્યા છે. વિશ્વકર્મા જયંતિના પવિત્ર અવસર પર આ કાર્યક્રમનો પ્રારંભ કરતા પીએમ મોદીએ ભારપૂર્વક જણાવ્યું કે પ્રાચીન ભારતીય કૌશલ્ય અને ૨૧મી સદીની અદ્યતન ટેકનોલોજીનું આ અદભુત સંયોજન જ દેશના આત્મનિર્ભર ભારત અને વિકસિત ભારતના વિઝનને સાકાર કરવાની સાચી તાકાત છે.

આ પ્રસંગે વૈશ્વિક સ્તરે ભારતના વધતા કદ વિશે વાત કરતા વડાપ્રધાને જણાવ્યું કે આજે દુનિયાનો ભારત પ્રત્યેનો વિશ્વાસ અભૂતપૂર્વ રીતે વધ્યો છે. ચાલુ વૈશ્વિક આર્થિક મંદી અને પડકારો વચ્ચે પણ દેશે ૭.૮% ની શાનદાર જીડીપી વૃદ્ધિ હાંસલ કરી છે, જે ભારતીય અર્થતંત્રની મજબૂત પાયાની ગવાહી આપે છે. જાપાનની ક્રેડિટ રેટિંગ એજન્સી દ્વારા ૩૫ વર્ષની લાંબી રાહ જોયા બાદ ભારતના રેટિંગમાં થયેલું અપગ્રેડ અને દેશમાં શરૂ થયેલો સુધારાઓનો સિલસિલો (રિફોર્મ એકસપ્રેસ) એ સાબિત કરે છે કે ભારત હવે વૈશ્વિક સપ્લાય ચેઈન અને ટેકનોલોજી જગતમાં આગેવાની કરવા માટે સંપૂર્ણપણે સજ્જ છે.

વૈશ્વિક ઉત્પાદકો માટે ચીન સિવાયના એકમાત્ર ભરોસાપાત્ર અને સુરક્ષિત વિકલ્પ તરીકે ઉભરી રહેલા ભારતે સેમિકન્ડકટર ઇકોસિસ્ટમને વેગ આપવા માટે મોહાલી અને સુરત જેવા શહેરોમાં ચિપના વ્યાપારી ઉત્પાદનની શરૂઆત કરી દીધી છે. સરકાર દ્વારા ઇન્ડિયા સેમિકન્ડકટર મિશન ૨.૦ ના ભંડોળને વધારીને ૧૩.૫ બિલિયન કરવામાં આવ્યું છે, જ્યારે એપ્લાઇડ મટિરિયલ્સ જેવી વૈશ્વિક કંપનીઓએ વિઝન ૨૦૩૫ અંતર્ગત ૫ બિલિયનના રોકાણની જાહેરાત કરી છે. દેશના ૧ લાખ યુવા એન્જિનિયરોને તાલીમ આપવાના લક્ષ્ય સાથે ભારત માત્ર ચિપ નિર્માણ જ નહીં, પરંતુ ડિઝાઇન, પેકેજિંગ અને સંશોધનમાં પણ વૈશ્વિક મહાસત્તા બનવાની દિશામાં અવિરત આગળ વધી રહ્યું છે.