નવી દિલ્હી, તા.૨૪ : ભારત અને જર્મની વચ્ચે અત્યાર સુધીની સૌથી મોટી ડિફેન્સ ડીલની તૈયારીઓ શરૂ થઈ ગઈ છે. આ ડીલ હેઠળ ભારતીય નૌસેનાને 6 અત્યાધુનિક ડીઝલ-ઇલેક્ટ્રિક સબમરીન મળશે, જેનાથી નૌસેનાની તાકાતમાં મોટો વધારો થશે. અંદાજે 8 અબજ ડોલરની આ ડીલને અંતિમ રૂપ આપવા સંરક્ષણ મંત્રી રાજનાથ સિંહ બર્લિનની મુલાકાત લેશે.

MDL-TKMS વચ્ચે થઈ હતી સમજૂતી

વર્ષ 2023માં ભારતની મઝગાંવ ડૉક શિપબિલ્ડર્સ લિમિટેડ (MDL) અને જર્મનીની થિસનકુપ મરીન સિસ્ટમ (TKMS) કંપની વચ્ચે એક સમજૂતી પર હસ્તાક્ષર થયા હતા. આ સમજૂતી સાથે જોડાયેલ ટેક્નોલૉજીનું આદાન-પ્રદાન કરવા અને સંરક્ષણ ઉદ્યોગમાં ભાગીદારી વધારવા માટે બંને દેશોના સંરક્ષણ મંત્રીઓ વચ્ચે વિસ્તારપૂર્વક ચર્ચા થશે. 

સબમરીનની ખાસિયત

આ સબમરીન AIP એટલે કે એર ઇન્ડિપેન્ડન્ટ પ્રોપલ્શન ટેક્નોલૉજીથી સજ્જ હશે. આ ટેક્નોલોજીના કારણે સબમરીન પાણીની સપાટી પર આવ્યા વગર બેથી ત્રણ સપ્તાહ સુધી પાણીમાં રહી શકે છે. આ ખાસિયત દુશ્મનની નજરથી બચીને વ્યૂહાત્મક અભિયાનને અંજામ આપવામાં મદદરૂપ થશે. સ્ટેલ્થ ટેક્નોલોજીને કારણે આ સબમરીન દુશ્મનના રડારમાં પકડવી મુશ્કેલ બનશે.

જો આ ડીલ ફાઇનલ થશે તો ભારત માટે અત્યાર સુધીની સૌથી મોટી સંરક્ષણ ડીલ હશે. હિંદ મહાસાગરમાં ચીનની વધતી હાજરીને ધ્યાનમાં રાખીને આ સબમરીન ભારતીય નૌસેનાને વ્યૂહાત્મક રીતે ખૂબ મજબૂત બનાવશે.