નવી દિલ્હી : ભારતીય ડાક વિભાગ (ઇન્ડિયા પોસ્ટ) દ્વારા ગ્રામીણ ડાક સેવક (GDS) ભરતી પરીક્ષાનું પરિણામ અને પ્રથમ મેરિટ યાદી સત્તાવાર રીતે જાહેર કરી દેવામાં આવી છે. આ ભરતી પ્રક્રિયા હેઠળ અરજી કરનારા દેશભરના લાખો ઉમેદવારો હવે પોતાના રાજ્ય અનુસાર પરિણામ જોઈ શકે છે. ડાક વિભાગ દ્વારા તમામ રાજ્યો માટે અલગ-અલગ મેરિટ યાદી PDF ફોર્મેટમાં તૈયાર કરવામાં આવી છે, જેને ઉમેદવારો સત્તાવાર વેબસાઇટ indiapost.gov.in/gdsonlineengagement ની મુલાકાત લઈને સરળતાથી ડાઉનલોડ કરી શકે છે.

જાહેર કરવામાં આવેલી મેરિટ યાદીમાં સફળ ઉમેદવારોનો સીરિયલ નંબર, ડિવિઝન, પોસ્ટ ઓફિસનું નામ, કેટેગરી, રજિસ્ટ્રેશન નંબર અને મેળવેલા ગુણની વિગતો દર્શાવવામાં આવી છે. જે ઉમેદવારોના રજિસ્ટ્રેશન નંબર આ યાદીમાં શોર્ટલિસ્ટ થયા છે, તેમને ખાલી પડેલી જગ્યાઓ પર તબક્કાવાર નિમણૂક આપવામાં આવશે. જોકે, આખરી પસંદગી અને ઓર્ડર મેળવતા પહેલા તમામ ઉમેદવારોએ ફરજિયાતપણે દસ્તાવેજ ચકાસણી (ડૉક્યુમેન્ટ વેરિફિકેશન) ની પ્રક્રિયામાંથી પસાર થવું પડશે.

રાજ્યવાર મેરિટ યાદી ડાઉનલોડ કરવા માટે ઉમેદવારોએ ઇન્ડિયા પોસ્ટની અધિકૃત વેબસાઇટ પર જઈને 'Shortlisted Candidates' વિભાગ પર ક્લિક કરવાનું રહેશે. ત્યારબાદ પોતપોતાનું રાજ્ય પસંદ કરવાથી પરિણામની PDF સ્ક્રીન પર ખુલશે, જેમાં ઉમેદવાર પોતાનો રજિસ્ટ્રેશન નંબર સર્ચ કરીને પરિણામ ચકાસી શકે છે.

જે ઉમેદવારોનું નામ મેરિટ લિસ્ટમાં આવ્યું છે, તેમણે ચકાસણી માટે પોતાના તમામ અસલ પ્રમાણપત્રો અને તેના બે સેટ ફોટોકોપી સાથે રાખવાના રહેશે. મુખ્ય દસ્તાવેજોમાં ધોરણ ૧૦ની માર્કશીટ, ઓળખકાર્ડ, જાતિનું પ્રમાણપત્ર, જન્મતારીખનું પ્રમાણપત્ર, EWS/દિવ્યાંગતા પ્રમાણપત્ર અને સરકારી હોસ્પિટલના તબીબી અધિકારી દ્વારા જારી કરાયેલું મેડિકલ સર્ટિફિકેટ ફરજિયાતપણે રજૂ કરવાનું રહેશે. વેરિફિકેશન પ્રક્રિયા સફળતાપૂર્વક પૂર્ણ થયા બાદ જ ઉમેદવારોને સંબંધિત ડાકઘરમાં નિમણૂક પત્ર આપવામાં આવશે.