નવી દિલ્હી : ભારત અને યુનાઇટેડ કિંગડમ વચ્ચે વ્યાપક આર્થિક અને વેપાર કરાર (CETA) અમલમાં આવવાની સાથે જ ગ્રાઉન્ડ લેવલ પર તેની ઐતિહાસિક અસરો દેખાવાની શરૂ થઈ ગઈ છે. આજે દેશના અલગ-અલગ રાજ્યો અને અગ્રણી ઔદ્યોગિક કેન્દ્રો પરથી પ્રથમ નિકાસ માલ (શિપમેન્ટ) ને ભારે ઉત્સાહ વચ્ચે યુકે તરફ રવાના કરવામાં આવ્યો છે. આ કરાર ભારતીય ઉત્પાદનો માટે બ્રિટનમાં લગભગ 99 ટકા નિકાસ માટે શૂન્ય-ડ્યુટી (Zero-Duty) બજાર ઍક્સેસ સુનિશ્ચિત કરે છે, જે વૈશ્વિક વેપારમાં ભારતની સ્પર્ધાત્મકતાને એક નવી જ ઊંચાઈ પર લઈ જશે.

વેપારની આ ઐતિહાસિક સફરની શરૂઆત કરતા કર્ણાટકના બેંગલુરુમાં યુકેના ડેપ્યુટી હાઇ કમિશનર ચંદ્રુ ઐયરે પ્રથમ કન્સાઇન્મેન્ટને લીલી ઝંડી બતાવી હતી અને જણાવ્યું હતું કે આ પ્રેફરન્શિયલ ટેરિફ બંને દેશોના વેપારને અજોડ વેગ આપશે. બીજી તરફ, પશ્ચિમ બંગાળના કોલકાતા એરપોર્ટના આંતરરાષ્ટ્રીય કાર્ગો સંકુલમાંથી વાણિજ્ય અને ઉદ્યોગ મંત્રી તાપસ રોયની ઉપસ્થિતિમાં સોનાના દાગીના, સોપારી, ચા અને કોફી જેવી પરંપરાગત ચીજોને વિધિવત રીતે રવાના કરવામાં આવી હતી. આ કરારથી આગામી દિવસોમાં પૂર્વ ભારતના શણ અને એન્જિનિયરિંગ ઉદ્યોગને બહુ મોટો ફાયદો થવાની આશા છે.

દક્ષિણ અને ઉત્તર ભારતમાં પણ આ કરારને લઈને ભારે ઉત્સાહ જોવા મળ્યો હતો. હૈદરાબાદમાં તેલંગાણાના ઉદ્યોગ સચિવ કૃષ્ણા આદિત્ય અને વરિષ્ઠ અધિકારીઓની હાજરીમાં ઉદ્ઘાટન શિપમેન્ટને લીલી ઝંડી અપાઈ હતી, જે તેલંગાણાના ઉત્પાદનોને યુકે બજારમાં સસ્તી અને મજબૂત સ્થિતિ આપશે. પંજાબના ટેક્સટાઇલ હબ લુધિયાણા અને અમૃતસરથી તૈયાર વસ્ત્રો તેમજ ઊની યાર્નના જથ્થાને ખાસ રવાના કરાયા હતા. અમૃતસરના શ્રી ગુરુ રામદાસ જી આંતરરાષ્ટ્રીય હવાઇમથકથી એર ઇન્ડિયાની બર્મિંગહામ સીધી ફ્લાઇટ દ્વારા ગારમેન્ટ્સનો જથ્થો મોકલાયો હતો, જે ફાર્માસ્યુટિકલ્સ, ફૂડ પ્રોસેસિંગ અને ખાસ કરીને MSME ક્ષેત્ર માટે વરદાન સાબિત થશે.

આ કરારનો સૌથી મોટો આર્થિક ચમકારો મહારાષ્ટ્રના મુંબઈમાં જોવા મળ્યો હતો. ભારતના સૌથી મોટા કન્ટેનરાઇઝ્ડ કાર્ગો પોર્ટ 'ન્હાવા શેવા' અને અગ્રણી નિકાસ હબ 'SEEPZ-SEZ' પરથી સાત મોટા નિકાસકારોના માલને રવાના કરવામાં આવ્યા હતા. SEEPZ ના વિકાસ કમિશનર જ્ઞાનેશ્વર બી. પાટીલે જણાવ્યું કે, યુકેમાં રત્નો અને ઝવેરાત (Gems & Jewellery) ક્ષેત્ર વાર્ષિક ₹2,109 કરોડથી વધુનું યોગદાન આપે છે. આજથી યુકે દ્વારા 4% આયાત ડ્યુટી નાબૂદ કરવામાં આવતા, ભારતીય ઝવેરાત ઉદ્યોગને વાર્ષિક અંદાજે ₹84 કરોડનો સીધો ટેરિફ લાભ મળશે. આ ક્રાંતિકારી કરાર માત્ર નિકાસ જ નહીં વધારે, પરંતુ દેશમાં મોટા પાયે રોજગારનું સર્જન પણ કરશે.