નવી દિલ્હી, તા.30: ભારત હવે વૈશ્વિક ઇલેક્ટ્રોનિક્સ અને સેમિકન્ડક્ટર મેન્યુફેક્ચરિંગ ક્ષેત્રે એક અગ્રણી ગ્લોબલ પાવરહાઉસ બનવા તરફ ઝડપથી ડગ માંડી રહ્યું છે. કેન્દ્ર સરકારે ભારતને વિશ્વનું મુખ્ય સેમિકન્ડક્ટર હબ બનાવવા માટે 2030 અને 2047 માટે અત્યંત મહત્વાકાંક્ષી ઉત્પાદન લક્ષ્યો નિર્ધારિત કર્યા છે, જેનાથી દેશમાં કરોડોનું વિદેશી રોકાણ આવશે અને રોજગારના નવા ક્ષેત્રો ઊભા થશે.
ઇન્ડો-જર્મન ચેમ્બર ઓફ કોમર્સ ડાયલોગ 2026 ને સંબોધતા ડિપાર્ટમેન્ટ ફોર પ્રમોશન ઓફ ઇન્ડસ્ટ્રી એન્ડ ઇન્ટરનલ ટ્રેડ (DPIIT) ના સચિવ અમરદીપ સિંહ ભાટિયાએ જણાવ્યું હતું કે, હાલમાં દેશમાં ઇલેક્ટ્રોનિક્સ અને સેમિકન્ડક્ટરનું વાર્ષિક ઉત્પાદન આશરે $330 બિલિયન છે. સરકારે વર્ષ 2030 સુધીમાં આ આંકડો વધારીને $500 બિલિયન સુધી પહોંચાડવાનો સ્પષ્ટ રોડમેપ તૈયાર કર્યો છે. એટલું જ નહીં, 'વિકસિત ભારત 2047' ના વિઝન હેઠળ આ ક્ષેત્રનું વાર્ષિક ઉત્પાદન $5.3 ટ્રિલિયનથી વધારીને $8 ટ્રિલિયન સુધી લઈ જવાની મોટી યોજના પર કામ થઈ રહ્યું છે.
આ મહત્વાકાંક્ષી લક્ષ્યો માત્ર કાગળ પરના આંકડા પૂરતા મર્યાદિત નહીં રહે, પરંતુ તેનાથી દેશમાં હાઇ-ટેક ઉત્પાદન એકમો અને નવા વિશાળ કારખાનાઓની સ્થાપના થશે. આ તકનીકી ક્રાંતિ ભારતને ગ્લોબલ સપ્લાય ચેઇનમાં અત્યંત મજબૂત અને નિર્ણાયક સ્થાન અપાવશે, તેમજ દેશના લાખો કુશળ યુવાનો માટે હાઇ-ટેક ક્ષેત્રે રોજગારીના સોનેરી અવસરો ઊભા કરશે.
ભારત અને જર્મની વચ્ચેના મજબૂત સંબંધોનો ઉલ્લેખ કરતા અમરદીપ સિંહ ભાટિયાએ ઉમેર્યું હતું કે, બંને દેશો વચ્ચે 25 વર્ષથી વધુની વ્યૂહાત્મક ભાગીદારી અને 100 વર્ષથી વધુ જૂના વેપારી સંબંધો છે. જર્મન કંપનીઓ આઝાદી પહેલાથી જ ભારતમાં સક્રિય છે. હવે સમય આવી ગયો છે કે ભારત અને જર્મની સેમિકન્ડક્ટર અને અદ્યતન ઇલેક્ટ્રોનિક્સ ઉત્પાદન ક્ષેત્રે પોતાની ભાગીદારીને નવી ઊંચાઈઓ પર લઈ જાય.