નવી દિલ્હી, તા.૦૪: ભારતીય વાયુસેના દ્વારા પશ્ચિમ સરહદે ૧૭ દિવસ લાંબા ભવ્ય યુદ્ધાભ્યાસની જાહેરાત કરવામાં આવતા જ પાકિસ્તાની સૈન્ય અને રાજકીય વર્તુળોમાં ભારે ખળભળાટ મચી ગયો છે. વાયુસેના દ્વારા આ યુદ્ધાભ્યાસ માટે વિધિવત 'NOTAM' (નોટિસ ટુ એરમેન) જાહેર કરી દેવામાં આવ્યું છે. ભારતની આ આક્રમક યુદ્ધાભ્યાસની યોજનાથી ગભરાઈ ગયેલા પાકિસ્તાનના સંરક્ષણ મંત્રાલયે ઉચ્ચ સ્તરીય સૈન્ય અધિકારીઓની તાકીદની ઇમરજન્સી બેઠક બોલાવવી પડી છે અને ભારત સાથેની સરહદ પર દેખરેખ અત્યંત કડક બનાવી દીધી છે.

૪૦ હજાર ફૂટની ઊંચાઈએ વાયુસેના બતાવશે તાકાત
મળતી સત્તાવાર વિગતો અનુસાર, ભારતીય વાયુસેના આગામી ૨૧ સપ્ટેમ્બરથી ૭ ઓક્ટોબર દરમિયાન રાજસ્થાનના જેસલમેર, બાડમેર, ફલોદી અને જોધપુર સેક્ટરમાં આ મહા-અભ્યાસ હાથ ધરશે. આ કવાયત માટે નાલ-બીકાનેર હવાઈ વિસ્તારને પણ ચોક્કસ સમય માટે બંધ રાખવામાં આવશે. વાયુસેના માટે ૪૦,૦૦૦ ફૂટની ઊંચાઈ સુધીનું વિશિષ્ટ હવાઈ ક્ષેત્ર (Airspace) રિઝર્વ રાખવામાં આવ્યું છે. આ ઉપરાંત, ૨૬ સપ્ટેમ્બરથી ૧૨ ઓક્ટોબર દરમિયાન જોધપુરમાં બહુરાષ્ટ્રીય વાયુસેના અભ્યાસ 'તરંગ શક્તિ ૨૦૨૬' પણ યોજાઈ શકે છે.

શું છે આ યુદ્ધાભ્યાસનો મુખ્ય ઉદ્દેશ્ય?
ભારતીય વાયુસેનાના આ ૧૭ દિવસીય યુદ્ધાભ્યાસનો મુખ્ય હેતુ પોતાની ઓપરેશનલ સિસ્ટમ, ત્વરિત તૈનાતીની ક્ષમતા, સૈન્યકર્મીઓની સજ્જતા અને આધુનિક ફાઈટર જેટ્સ વચ્ચે ઉત્કૃષ્ટ તાલમેલની ચકાસણી કરવાનો છે. આ કવાયતમાં ભારત ભારતીય વાયુસેનાના અદ્યતન ફાઈટર જેટ્સ અને બોમ્બર વિમાનો સાથે જટિલ એર ઓપરેશન્સનું વિહંગાવલોકન કરશે.

NOTAM એટલે શું?
NOTAM નો અર્થ 'Notice to Airmen' (નોટિસ ટુ એરમેન) થાય છે. જ્યારે પણ કોઈ દેશ યુદ્ધાભ્યાસ, મિસાઈલ ટેસ્ટિંગ, રોકેટ લોન્ચિંગ કે કોઈ અસામાન્ય પરિસ્થિતિ દરમિયાન ચોક્કસ વિસ્તારમાંથી નાગરિક કે સૈન્ય વિમાનોની ઉડાન સુરક્ષિત રાખવા માગતો હોય, ત્યારે આ પ્રકારની નોટિસ જાહેર કરીને તે એરસ્પેસને અન્ય ફ્લાઈટ્સ માટે અસ્થાયી રૂપે પ્રતિબંધિત કરવામાં આવે છે.