મુંબઈ:  ભારતના ઓટોમોબાઈલ ઇન્ડસ્ટ્રી માટે એક અત્યંત ગર્વ સમાન સમાચાર સામે આવ્યા છે. સ્કોડા ઓટો ફોક્સવેગન ઇન્ડિયા પ્રાઇવેટ લિમિટેડ (SAVWIPL) એ વૈશ્વિક બજારમાં પોતાની મજબૂત પકડ સાબિત કરીને નાણાકીય વર્ષ ૨૦૨૫-૨૬ માટે મુંબઈ પોર્ટ ઓથોરિટી તરફથી પ્રતિષ્ઠિત "ઓટોમોબાઇલ: ટોપ એક્સપોર્ટર" નો એવોર્ડ પોતાના નામે કરી લીધો છે. કંપનીએ માત્ર આ એક જ વર્ષ દરમિયાન મુંબઈ પોર્ટના માધ્યમથી ૪૦,૦૦૦ થી વધુ વાહનોની વિદેશમાં સફળતાપૂર્વક નિકાસ કરીને એક નવો સીમાચિહ્ન સ્થાપિત કર્યો છે. ભારતીય રૂપિયામાં આવી રહેલા ઉતાર-ચઢાવ અને આંતરરાષ્ટ્રીય સ્તરે ચલણના દબાણ વચ્ચે પણ ભારતમાં બનેલી કારોની વિદેશમાં માંગ સતત વધી રહી છે, જે દેશના મજબૂત ઉત્પાદન ક્ષેત્રની સાબિતી આપે છે.
મુંબઈ પોર્ટ ઓથોરિટી દ્વારા આયોજિત ખાસ 'બિઝનેસ કોન્ક્લેવ વિથ પાર્ટનર્સ' કાર્યક્રમમાં કંપનીના વાઇસ પ્રેસિડેન્ટ (લોજિસ્ટિક્સ) અમિત મદનને આ એવોર્ડ એનાયત કરવામાં આવ્યો હતો. ખાસ વાત એ છે કે કંપનીએ સતત બીજા વર્ષે આ સર્વોચ્ચ નિકાસકારનો ખિતાબ જાળવી રાખ્યો છે, કારણ કે અગાઉ વર્ષ ૨૦૨૩-૨૪માં પણ આ એવોર્ડ સ્કોડા ફોક્સવેગનને જ મળ્યો હતો. અત્યાર સુધીમાં કંપનીએ ભારતમાં તૈયાર કરેલા ૭.૨૫ લાખથી વધુ વાહનો એશિયા, આફ્રિકા, મધ્ય પૂર્વ (મિડલ ઈસ્ટ) અને ઉત્તર અમેરિકાના દેશોના રસ્તાઓ પર દોડાવ્યા છે. કંપનીના મેનેજિંગ ડિરેક્ટર અને સીઈઓ પિયુષ અરોરાએ આ સિદ્ધિ બદલ ખુશી વ્યક્ત કરતા જણાવ્યું કે, ભારત હવે તેમના વૈશ્વિક ગ્રૂપ માટે એક મજબૂત નિકાસ હબ તરીકે ઉભરી આવ્યું છે અને આ એવોર્ડ તેમની સર્વોચ્ચ પ્રીમિયમ ગુણવત્તા પર મહોર મારે છે.

હાલમાં આ કંપની ભારતમાંથી ફોક્સવેગન તૈગુન, વર્ચસ તેમજ સ્કોડા કુશાક અને સ્લેવિયા જેવા સુપરહિટ મોડેલોની નિકાસ કરી રહી છે. આ ઉપરાંત, કંપની માત્ર આખી કાર જ નહીં પરંતુ ભારતમાં બનેલા હાઈ-ક્વોલિટી ઓટો પાર્ટ્સ અને કમ્પોનન્ટ્સની નિકાસ પર પણ ખાસ ધ્યાન કેન્દ્રિત કરી રહી છે. તાજેતરમાં જ પાડોશી દેશ શ્રીલંકાના બજારમાં ધમાકેદાર એન્ટ્રી કર્યા બાદ હવે કંપની અન્ય ઘણા નવા આંતરરાષ્ટ્રીય બજારોની શોધમાં છે. આ આક્રમક રણનીતિને કારણે આગામી સમયમાં ભારતના ઓટોમોબાઈલ એક્સપોર્ટ ગ્રોથમાં મોટો ઉછાળો આવવાની પૂરેપૂરી સંભાવનાઓ દેખાઈ રહી છે.