નવી દિલ્હી, તા.૧૪: ભારતીય ઓટોમોબાઈલ ઉદ્યોગ માટે એક અત્યંત ગૌરવપૂર્ણ અને ઐતિહાસિક સમાચાર સામે આવ્યા છે. ભારતમાં બનેલી કારો હવે વિદેશી બજારોમાં ધૂમ મચાવી રહી છે, જેમાં મારુતિ સુઝુકીએ ટેકનોલોજી અને ગુણવત્તામાં અગ્રણી ગણાતા જાપાનના બજારમાં ૧ લાખ યુનિટ્સ કારની સફળ નિકાસ કરીને નવો માઈલસ્ટોન સ્થાપિત કર્યો છે. ભારતમાં નિર્મિત 'ફ્રોન્ક્સ' (Fronx), 'જિમ્ની 5-ડોર' (Jimny 5-Door) અને કંપનીની પ્રથમ ઈલેક્ટ્રિક SUV 'ઈ-વિટારા' (e-Vitara) ની જાપાનમાં જબરદસ્ત માંગ જોવા મળી રહી છે, જેના કારણે જાપાન હવે મારુતિ સુઝુકી માટે વિશ્વનું બીજું સૌથી મોટું નિકાસ બજાર બની ગયું છે.

આ ભવ્ય સફળતા સાથે જ નાણાકીય વર્ષ ૨૦૨૫-૨૬માં સુઝુકી જાપાનની નંબર-૧ વહીકલ ઈમ્પોર્ટર (વાહન આયાતકાર) કંપની બની ગઈ છે. જાપાન જેવા કડક ક્વોલિટી અને સેફ્ટી સ્ટાન્ડર્ડ ધરાવતા દેશના તમામ માપદંડો પર ભારતમાં બનેલી આ કારો ખરી ઉતરી છે. જાપાનમાં આયાત કરવામાં આવતી સુઝુકીની લગભગ ૧૦૦ ટકા કારોનું ઉત્પાદન ભારતમાં મારુતિ સુઝુકી દ્વારા જ કરવામાં આવી રહ્યું છે, જે ભારતીય મેન્યુફેક્ચરિંગ સેક્ટરની વૈશ્વિક ક્ષમતા સાબિત કરે છે.

આ ઐતિહાસિક સફરની શરૂઆત ઓગસ્ટ ૨૦૨૪માં 'ફ્રોન્ક્સ'ના પ્રથમ શિપમેન્ટ સાથે થઈ હતી. ત્યારબાદ ડિસેમ્બર ૨૦૨૪માં 'જિમ્ની 5-ડોર' અને સપ્ટેમ્બર ૨૦૨૫માં મારુતિની પ્રથમ ઈલેક્ટ્રિક SUV 'ઈ-વિટારા' રજૂ કરવામાં આવી હતી. નોંધનીય છે કે, 'જિમ્ની 5-ડોર' અને 'ઈ-વિટારા' સમગ્ર વૈશ્વિક બજાર માટે માત્ર અને માત્ર ભારતમાં જ બનાવવામાં આવે છે.

નાણાકીય વર્ષ ૨૦૨૫-૨૬ અને એપ્રિલથી ઓગસ્ટ ૨૦૨૬-૨૭ સુધીના ગાળામાં જાપાનમાં મારુતિની વધી રહેલી લોકપ્રિયતાએ નિકાસ વ્યવસાયને નવી ઊંચાઈ આપી છે. આ સિદ્ધિ એ વાતનું સ્પષ્ટ પ્રતીક છે કે ભારતીય પ્લાન્ટ્સ હવે માત્ર સ્થાનિક જરૂરિયાતો પૂરતા મર્યાદિત નથી રહ્યા, પરંતુ વૈશ્વિક સ્તરના સર્વોચ્ચ ગુણવત્તા માપદંડોને સફળતાપૂર્વક પરિપૂર્ણ કરી રહ્યા છે.