નવી દિલ્હી:  માર્ચ 2026 ના તાજા આંકડાઓ ભારતની મજબૂત આર્થિક સ્થિતિની સાક્ષી પૂરી રહ્યા છે. મધ્ય પૂર્વમાં ચાલી રહેલી ભૌગોલિક રાજકીય અસ્થિરતા છતાં, ભારતનો ઔદ્યોગિક ઉત્પાદન વૃદ્ધિ દર (IIP) 4.1 ટકા પર પહોંચ્યો છે. રસપ્રદ વાત એ છે કે, મેન્યુફેક્ચરિંગ સેક્ટરના 23 માંથી 14 ઉદ્યોગોએ હકારાત્મક દેખાવ કર્યો છે. ગયા વર્ષના સમાન ગાળામાં આ આંકડો 3.9 ટકા હતો, જે દર્શાવે છે કે ભારતીય ફેક્ટરીઓ હવે વધુ ઝડપે ધમધમી રહી છે. જોકે, નિષ્ણાતો માને છે કે આ વૃદ્ધિ પાંચ મહિનાના નીચલા સ્તરે હોવા છતાં, અર્થતંત્રનો પાયો એકદમ મજબૂત છે.

આ વૃદ્ધિ પાછળના અસલી 'હીરો' મેટલ અને ઓટોમોબાઇલ સેક્ટર સાબિત થયા છે. 'મૂળભૂત ધાતુઓના ઉત્પાદન'માં 8.6 ટકાનો તોતિંગ વધારો જોવા મળ્યો છે, જેમાં ખાસ કરીને સ્ટીલ શીટ્સ અને એલોય સ્ટીલની માંગમાં જબરદસ્ત ઉછાળો આવ્યો છે. સૌથી વધુ આશ્ચર્યજનક વૃદ્ધિ 'મોટર વાહનો અને ટ્રેઇલર્સ'ના ઉત્પાદનમાં 18.1 ટકા જેટલી નોંધાઈ છે, જે સૂચવે છે કે લોકોની ખરીદશક્તિ વધી રહી છે અને ટ્રાન્સપોર્ટેશન સેક્ટરમાં નવી તેજી આવી રહી છે. મશીનરી અને સાધનોના ક્ષેત્રે પણ 11.2 ટકાનો વધારો એ દેશમાં થઈ રહેલા આધુનિકીકરણનો પુરાવો છે.

માઇનિંગ અને પાવર સેક્ટરની વાત કરીએ તો, ખાણકામમાં વૃદ્ધિ દર 1.2 ટકાથી કૂદીને સીધો 5.5 ટકા પર પહોંચી ગયો છે, જે ઉદ્યોગો માટે કાચા માલની ઉપલબ્ધતા સુનિશ્ચિત કરે છે. ઈન્ફ્રાસ્ટ્રક્ચર અને બાંધકામ સામગ્રીમાં 6.7 ટકાનો વધારો દેશમાં ચાલી રહેલા મેગા પ્રોજેક્ટ્સની ગતિ દર્શાવે છે. ભલે વીજળીના ઉત્પાદનમાં નજીવો વધારો થયો હોય, પરંતુ એકંદરે નાણાકીય વર્ષ 2025-26 માટે ઔદ્યોગિક વિકાસ દર 4.1 ટકા પર સ્થિર રહીને ભારતે સાબિત કર્યું છે કે તે વિશ્વના સૌથી ઝડપથી વિકસતા અર્થતંત્રોમાંનું એક છે.