વોશિંગ્ટન: અમેરિકાના ઇલિનોઇ રાજ્યના ડેસ પ્લેઇન્સમાં રહેતા ૩૬ વર્ષીય ભારતીય નાગરિક સૈયદ મુર્તુઝા કબલઝાદાએ મેડિકેર યોજનામાં ૨૨.૭ કરોડ ડોલરના ખોટા દાવા રજૂ કરવાના કૌભાંડમાં ગુનો કબૂલ્યો છે. અમેરિકી ન્યાય વિભાગે ૩૦ ઓક્ટોબરે આ માહિતી જાહેર કરી હતી.

કોર્ટના દસ્તાવેજો મુજબ આરોપી અને તેના સાથીઓએ શિકાગો વિસ્તારની ત્રણ પ્રયોગશાળાઓ હસ્તગત કરી હતી. પાકિસ્તાનની એક કંપનીને આશરે ૧.૧ કરોડ ડોલર ચૂકવી લાખો લાભાર્થીઓની વ્યક્તિગત માહિતી મેળવાઈ હતી. આ વિગતોના આધારે લાભાર્થીઓએ મંગાવી ન હોય અને તેમને મોકલાઈ પણ ન હોય તેવી કોરોના પરીક્ષણ કિટનાં બિલો રજૂ કરાયાં હતાં.

કુલ ખોટા દાવા સામે મેડિકેરે આશરે ૧૩.૬ કરોડ ડોલર ચૂકવ્યા હતા. આરોપીએ જપ્ત કરાયેલી ૪.૬ કરોડ ડોલરથી વધુ રકમ છોડવા સંમતિ આપી છે. તેણે આરોગ્યસેવા છેતરપિંડીના બે ગુના કબૂલ્યા છે; સજા હવે પછી નક્કી થશે અને મહત્તમ ૨૦ વર્ષની કેદ થઈ શકે છે.