વોશિંગ્ટન : અમેરિકા જવા ઈચ્છતા અને ત્યાં સ્થાયી થવા માંગતા ભારતીય વ્યાવસાયિકો માટે વધુ એક ચિંતાજનક સમાચાર સામે આવ્યા છે. યુએસ ડિપાર્ટમેન્ટ ઓફ સ્ટેટ દ્વારા આગામી જૂન ૨૦૨૬ ના મહિના માટે વિઝા બુલેટિન જાહેર કરવામાં આવ્યું છે. આ બુલેટિનમાં રોજગાર આધારિત ગ્રીન કાર્ડ મેળવવા માંગતા ભારતીય અરજદારોને મોટો આંચકો લાગ્યો છે. વિઝાની ભારે માંગ અને ઉપલબ્ધતા કરતા વધુ વપરાશ થવાને કારણે EB-1 અને EB-2 કેટેગરીમાં ફાઈનલ એક્શન ડેટ્સ ગત મહિનાઓ કરતા પાછળ ધકેલી દેવામાં આવી છે જેને ટેકનિકલ ભાષામાં રીટ્રોગ્રેસન કહેવામાં આવે છે.

આ નવા આંકડાઓ પ્રમાણે, ભારતીય અરજદારો માટે અત્યંત લોકપ્રિય એવી EB-1 (એક્સ્ટ્રા ઓર્ડિનરી એબિલિટી અને મલ્ટીનેશનલ એક્ઝિક્યુટિવ્સ) કેટેગરીની ફાઈનલ એક્શન ડેટ બદલાઈને હવે ૧૫ ડિસેમ્બર ૨૦૨૨ થઈ ગઈ છે. તેવી જ રીતે EB-2 (એડવાન્સ્ડ ડિગ્રી હોલ્ડર્સ) કેટેગરીની સ્થિતિ પણ વધુ વણસી છે અને તેની તારીખ ૧ સપ્ટેમ્બર ૨૦૧૩ પર પહોંચી ગઈ છે. બીજી તરફ, EB-3 કેટેગરીમાં તારીખ ૧૫ ડિસેમ્બર ૨૦૧૩ ના સ્તરે યથાવત રાખવામાં આવી છે. આ ફેરફારોના કારણે હજારો ભારતીય આઈટી એન્જિનિયરો અને અન્ય ક્ષેત્રના નિષ્ણાતોએ ગ્રીન કાર્ડ માટે લાંબી પ્રતીક્ષા કરવી પડશે.

યુએસ સ્ટેટ ડિપાર્ટમેન્ટે સત્તાવાર નિવેદન બહાર પાડીને આ પરિસ્થિતિ અંગે સ્પષ્ટતા કરી છે. તેમના જણાવ્યા અનુસાર, નાણાકીય વર્ષ ૨૦૨૬ ના વાર્ષિક ક્વોટાની મર્યાદા જાળવી રાખવા માટે આ આકરા પગલાં લેવા અનિવાર્ય બન્યા હતા. ભારતીય ચાર્જેબિલિટી ધરાવતા અરજદારો દ્વારા EB-1 અને EB-2 વિઝા કેટેગરીમાં એટલી મોટી સંખ્યામાં વિઝા વાપરવામાં આવ્યા છે કે વાર્ષિક લિમિટ પૂરી થવાના આરે છે. સ્ટેટ ડિપાર્ટમેન્ટે એવી ગંભીર ચેતવણી પણ આપી છે કે જો ચાલુ નાણાકીય વર્ષ સમાપ્ત થતા પહેલા ભારતની ફાળવેલી મર્યાદા વહેલી પૂરી થઈ જશે તો આગામી મહિનાઓમાં તારીખો હજુ વધુ પાછળ જઈ શકે છે અથવા તો આ કેટેગરીઝને થોડા સમય માટે ‘અનએવેલેબલ’ એટલે કે સંપૂર્ણપણે બંધ જાહેર કરવી પડી શકે છે.

રોજગાર આધારિત વિઝા ઉપરાંત રોકાણકારો માટેની કેટેગરીમાં પણ ચિંતાના વાદળો ઘેરાયા છે. અમેરિકામાં મોટા પાયે નાણાકીય રોકાણ કરીને ગ્રીન કાર્ડ મેળવવા ઈચ્છતા ભારતીયો માટેની EB-5 અનરિઝર્વ્ડ કેટેગરી પર પણ દબાણ વધ્યું છે. બુલેટિનમાં જણાવાયું છે કે ભારતીય રોકાણકારો તરફથી વધી રહેલી માંગને જોતા આવતા મહિના સુધીમાં આ કેટેગરીમાં પણ રીટ્રોગ્રેસન જોવા મળી શકે છે અથવા તો વિઝા અપ્રાપ્ય બની શકે છે. જો કે, EB-5 ના સેટ-અસાઇડ ગ્રામીણ (૨૦%), હાઈ અનએમ્પ્લોયમેન્ટ (૧૦%) અને ઈન્ફ્રાસ્ટ્રક્ચર (૨%) કેટેગરીમાં હાલની સ્થિતિ યથાવત ‘કરન્ટ’ રાખવામાં આવી છે.

સમગ્ર વિશ્વમાંથી અમેરિકામાં કાયમી વસવાટ કરવા માંગતા લોકો માટે વિઝા બુલેટિન એક મહત્વપૂર્ણ માર્ગદર્શિકા તરીકે કામ કરે છે. તેમાં મુખ્યત્વે બે વિભાગો હોય છે, ‘ડેટ્સ ફોર ફાઈલિંગ’ જેના આધારે અરજદારો જાણી શકે છે કે તેઓ ક્યારે પોતાનું સ્ટેટસ એડજસ્ટ કરવા માટેની અરજી સબમિટ કરી શકે છે અને ‘ફાઈનલ એક્શન ડેટ્સ’ જે કાયમી ગ્રીન કાર્ડ મળવાનો અંદાજિત પ્રતીક્ષા સમય દર્શાવે છે. કાયદાકીય જોગવાઈઓ મુજબ વાર્ષિક ધોરણે ૨,૨૬,૦૦૦ ફેમિલી સ્પોન્સર્ડ વિઝા ફાળવવામાં આવે છે અને કોઈપણ એક દેશને કુલ વિઝાના ૭ ટકાથી વધુ વિઝા આપી શકાતા નથી. ભારત, ચીન, મેક્સિકો અને ફિલિપાઈન્સ જેવા દેશોમાં માંગ નિર્ધારિત ક્વોટા કરતા ઘણી વધારે હોવાને કારણે અહીં જટિલ પ્રક્રિયા અને લાંબો બેકલોગ સર્જાઈ રહ્યો છે.