મેલબોર્ન: વિદેશમાં જઈને ઉચ્ચ શિક્ષણ મેળવવા ઈચ્છતા, ખાસ કરીને ભારત અને ગુજરાતના હજારો વિદ્યાર્થીઓ માટે ઑસ્ટ્રેલિયાથી એક અત્યંત મહત્વના અને મોટા સમાચાર સામે આવ્યા છે. ઑસ્ટ્રેલિયા સરકારે આંતરરાષ્ટ્રીય વિદ્યાર્થીઓની નોંધણી કરવા માંગતી નવી વ્યાવસાયિક શિક્ષણ અને તાલીમ (VET) સંસ્થાઓની અરજીઓ પર આગામી ૧૨ મહિના માટે વચગાળાનો સંપૂર્ણ પ્રતિબંધ (સસ્પેન્શન) લગાવી દીધો છે. આ આદેશની સત્તાવાર જાહેરાત ઑસ્ટ્રેલિયાના આંતરરાષ્ટ્રીય શિક્ષણના સહાયક પ્રધાન જુલિયન હિલ દ્વારા કરવામાં આવી છે.

સરકારના આ કડક નિર્ણયને પગલે હવે 'કોમનવેલ્થ રજિસ્ટર ઓફ ઇન્સ્ટિટ્યુશન્સ એન્ડ કોર્ષ ફોર ઓવરસીઝ સ્ટુડન્ટ્સ' (CRICOS) હેઠળ નવી સંસ્થાઓ આગામી એક વર્ષ સુધી વિદેશી વિદ્યાર્થીઓને એડમિશન આપવા માટે રજીસ્ટ્રેશન કરાવી શકશે નહીં. ઑસ્ટ્રેલિયન સ્કિલ્સ ક્વોલિટી ઓથોરિટી (ASQA) ને મળેલી આવી તમામ નવી દરખાસ્તોને હાલ પૂરતી રોકી દેવામાં આવી છે.

વિઝા સિસ્ટમનો દુરુપયોગ અને નકલી સંસ્થાઓ પર ત્રાટકશે 'કોરડો'

ઑસ્ટ્રેલિયા સરકારના જણાવ્યા અનુસાર, છેલ્લા કેટલાક સમયથી દેશના ખાનગી વ્યાવસાયિક શિક્ષણ ક્ષેત્ર (VET સેક્ટર) માં અખંડિતતા અને ગુણવત્તાને લઈને ગંભીર સવાલો ઊભા થયા હતા. વર્ષ ૨૦૨૩ માં બહાર આવેલી નિક્સન સમીક્ષા અને સ્થળાંતર સમીક્ષાના અહેવાલોમાં ચોંકાવનારો ખુલાસો થયો હતો કે, ઘણા તત્વો ઑસ્ટ્રેલિયાની પ્રતિષ્ઠિત વિઝા સિસ્ટમનો દુરુપયોગ કરી રહ્યા છે. માત્ર વિઝા અપાવવાના બહાને ખોટી અને નકલી સંસ્થાઓ ખોલીને આંતરરાષ્ટ્રીય શિક્ષણ ઉદ્યોગની ગરિમાને કલંકિત કરવામાં આવી રહી હતી. આથી, શિક્ષણ કાયદો સુધારો (અખંડિતતા અને અન્ય પગલાં) અધિનિયમ ૨૦૨૫ હેઠળ સરકારે આ કડક કદમ ઉઠાવ્યું છે.

જાહેર અને સ્થાપિત યુનિવર્સિટીઓને ચિંતા કરવાની જરૂર નથી

ઑસ્ટ્રેલિયા સરકારે સ્પષ્ટ કર્યું છે કે આ સસ્પેન્શન માત્ર નવા બજારમાં પ્રવેશતા ખાનગી પ્લેયર્સ માટે છે. સરકારી શાળાઓ, TAFE પ્રદાતાઓ અને દેશની મુખ્ય 'ટેબલ A' યુનિવર્સિટીઓ જેવી જાહેર સંસ્થાઓને આ પ્રતિબંધમાંથી સંપૂર્ણ મુક્તિ આપવામાં આવી છે. આ સિવાય, જે સંસ્થાઓ પહેલેથી જ કાર્યરત છે તેઓ પોતાના માન્ય અભ્યાસક્રમોમાં નવી બેઠકો ઉમેરી શકશે.

આંતરરાષ્ટ્રીય શિક્ષણ પ્રધાન જુલિયન હિલે જણાવ્યું હતું કે, ઑસ્ટ્રેલિયા હંમેશા સાચા અને ભણવા ઈચ્છતા વાસ્તવિક વિદ્યાર્થીઓનું ખુલ્લા દિલથી સ્વાગત કરે છે. પરંતુ ગ્લોબલ એજ્યુકેશન માર્કેટમાં વધુ પડતા સેચ્યુરેશન (ભરાવો) અને છેતરપિંડીને રોકવા માટે આ 'થોભો અને રાહ જુઓ' (Pause) ની નીતિ ખૂબ જ જરૂરી હતી. ઑસ્ટ્રેલિયાની પ્રતિષ્ઠા ટકાવી રાખવા માટે અમારે ગુણવત્તા અને વિદ્યાર્થીઓના વાસ્તવિક અનુભવ પર નિર્દયતાથી ધ્યાન કેન્દ્રિત કરવું પડશે. આ નિર્ણયથી એજન્ટો દ્વારા થતી છેતરપિંડીનો ભોગ બનતા ભારતીય વિદ્યાર્થીઓ લાંબે ગાળે સુરક્ષિત બનશે.