સેન્ટ લુઇસ (અમેરિકા): તા.૦૮ અમેરિકાના તબીબી ક્ષેત્રે ફરી એકવાર ભારતીય મૂળના વૈજ્ઞાનિકે પોતાની તેજસ્વીતા સાબિત કરી છે. સેન્ટ લુઇસ સ્થિત વોશિંગ્ટન યુનિવર્સિટી (WashU) ના પ્રખ્યાત કેન્સર સર્જન ડૉ. સિદ્ધાર્થ (સિડ) વી. પુરમની પસંદગી 'અમેરિકન સોસાયટી ફોર ક્લિનિકલ ઇન્વેસ્ટિગેશન' (ASCI) માં કરવામાં આવી છે. ૧૯૦૮માં સ્થપાયેલી આ સોસાયટી અમેરિકાની સૌથી જૂની અને અત્યંત સન્માનિત મેડિકલ સોસાયટીઓમાંની એક છે, જેમાં માત્ર એવા જ ડૉક્ટરોને સ્થાન મળે છે જેમણે રોગોના નિદાન અને સારવારમાં વિશ્વસ્તરીય સંશોધન કર્યું હોય.
ડૉ. સિદ્ધાર્થ પુરમ હાલમાં સાઈટમેન કેન્સર સેન્ટર ખાતે હેડ એન્ડ નેક ટ્યુમર સેન્ટરના સહ-નિર્દેશક તરીકે કાર્યરત છે. તેમનું મુખ્ય સંશોધન 'હેડ એન્ડ નેક કેન્સર' (મોઢા અને ગળાનું કેન્સર) પર કેન્દ્રિત છે. ખાસ કરીને કેન્સરના ગાંઠો કેવી રીતે વધે છે, સારવાર સામે કેવી રીતે પ્રતિકાર કરે છે અને શરીરમાં કેવી રીતે ફેલાય છે, તે સમજવામાં ડૉ. પુરમે મોટું યોગદાન આપ્યું છે. તેમના સિંગલ-સેલ એનાલિસિસના રિસર્ચથી વૈજ્ઞાનિકોને કેન્સરની સારવાર માટે નવા લક્ષ્યો શોધવામાં અને દર્દીઓના જીવ બચાવવામાં મોટી મદદ મળી છે.
ડૉ. પુરમનો જન્મ મિનેસોટામાં ભારતીય પ્રવાસી માતા-પિતાને ત્યાં થયો હતો. પોતાની સંઘર્ષગાથા વાગોળતા તેમણે જણાવ્યું હતું કે, તેમના પિતા વધુ સારી તકોની શોધમાં ભારત છોડી અમેરિકા આવ્યા હતા. મિનેસોટામાં ભારતીય સમુદાયના સહકાર અને પોતાની મહેનતને કારણે તેઓ આ મુકામ સુધી પહોંચી શક્યા છે. બાળપણમાં આઇસ હોકી, સ્કીઇંગ અને સોકર રમતા સિદ્ધાર્થે ક્યારેય સપનામાં પણ વિચાર્યું નહોતું કે તેઓ એક દિવસ વિશ્વના શ્રેષ્ઠ કેન્સર નિષ્ણાતોની યાદીમાં સ્થાન પામશે.
શિકાગોમાં યોજાયેલી વાર્ષિક બેઠકમાં તેમને સત્તાવાર રીતે આ સન્માન એનાયત કરવામાં આવ્યું હતું. ડૉ. પુરમની આ સફળતા માત્ર તેમના પરિવાર માટે જ નહીં, પરંતુ સમગ્ર ભારતીય સમુદાય માટે ગૌરવની વાત છે, કારણ કે તેમનું સંશોધન આગામી સમયમાં કેન્સર જેવી જીવલેણ બીમારી સામે લડવા માટે નવી દિશા ચીંધશે.