રાજકોટ, તા. ૦૧ જૂન, ૨૦૨૬ નોર્ડિક દેશ ફિનલેન્ડમાં ઇમિગ્રેશનના નિયમો વધુ કડક બનાવવામાં આવ્યા હોવા છતાં, ત્યાંની નાગરિકતા મેળવનારાઓમાં મોટો ઉછાળો જોવા મળ્યો છે. ફિનિશ ઇમિગ્રેશન સર્વિસ (મિગ્રી) દ્વારા બહાર પાડવામાં આવેલા તાજેતરના આંકડા મુજબ, વર્ષ ૨૦૨૫માં ફિનલેન્ડે રેકોર્ડ ૧૪,૭૦૩ લોકોને નાગરિકતા આપી છે. આ આંકડો અગાઉના વર્ષ ૨૦૨૪ના ૧૩,૯૭૩ના આંકડાને પણ વટાવી ગયો છે. નિષ્ણાતોના મતે, આ વૃદ્ધિ પાછળનું મુખ્ય કારણ વર્ષોથી પેન્ડિંગ રહેલી અરજીઓના બેકલોગનો નિકાલ હોવાનું માનવામાં આવે છે.
પરિવારના સભ્યો માટે ભારત ટોચના સ્થાને
ફિનલેન્ડમાં વર્ક-આધારિત પરમિટ અને વિદ્યાર્થી વિઝામાં ભલે ઘટાડો નોંધાયો હોય, પરંતુ 'ફેમિલી રિયુનિયન' એટલે કે પરિવારના સભ્યો માટેની અરજીઓમાં ૧૦ ટકાનો જબરદસ્ત વધારો જોવા મળ્યો છે. મિગ્રીના ડેટા મુજબ, એશિયન દેશોમાંથી આવતા લોકોમાં ભારત, ફિલિપાઈન્સ અને શ્રીલંકાના અરજદારો સૌથી વધુ છે. ફિનલેન્ડમાં પહેલેથી જ કાર્યરત ભારતીય કામદારો અને વિદ્યાર્થીઓ હવે તેમના પરિવારજનોને પણ સાથે બોલાવી રહ્યા હોવાથી ફેમિલી પરમિટની માંગમાં ઉછાળો આવ્યો છે.
ઔદ્યોગિક પ્રોજેક્ટ્સને કારણે વર્ક વિઝામાં સુધારાના સંકેત
ફિનલેન્ડના કડક ઇમિગ્રેશન નિયમો અને આર્થિક મંદીના કારણે ગયા વર્ષે વર્ક પરમિટમાં લગભગ ૨૫ ટકાનો ઘટાડો થયો હતો, જેમાં હેલ્થકેર અને બાંધકામ ક્ષેત્રે સૌથી વધુ અસર પડી હતી. જોકે, વર્ષ ૨૦૨૬ના શરૂઆતના મહિનાઓ આશાસ્પદ રહ્યા છે. નવા મોટા ઔદ્યોગિક પ્રોજેક્ટ્સની શરૂઆતને પગલે આંતરરાષ્ટ્રીય કામદારોની માંગ વધી છે, જેના કારણે વર્ક-આધારિત નિવાસ પરમિટ માટેની અરજીઓમાં ૧૧ ટકાનો વધારો નોંધાયો છે.
નાગરિકતા મેળવવી હવે પહેલા જેવી સરળ નથી
ફિનલેન્ડ સરકારે ૨૦૨૪થી નાગરિકતા માટેના નિયમો અત્યંત કડક બનાવ્યા છે. નવા કાયદાઓ લાગુ થાય તે પહેલાં લોકોએ મોટી સંખ્યામાં અરજીઓ કરી હતી, જેના કારણે છેલ્લા બે વર્ષમાં રેકોર્ડબ્રેક મંજૂરીઓ મળી છે. જોકે, હવે કડક માપદંડોને કારણે નવી અરજીઓનું પ્રમાણ ઘટીને ઐતિહાસિક સરેરાશ સ્તરે આવી ગયું છે. હાલમાં ફિનલેન્ડની કુલ ૫.૬૫ મિલિયનની વસ્તીમાંથી અંદાજે ૧૦ ટકા લોકો વિદેશમાં જન્મેલા છે, જે દર્શાવે છે કે આ દેશ હજુ પણ વૈશ્વિક પ્રતિભા માટે આકર્ષણનું કેન્દ્ર છે.