નવી દિલ્હી: મોદી સરકારે શનિવારે પોતાની "પ્રહાર" વ્યૂહરચનાના ભાગ રૂપે, દેશની સુરક્ષા અને અખંડિતતાને જોખમમાં મૂકતા પાકિસ્તાન સ્થિત લશ્કર-એ-તૈયબા (LeT) અને જૈશ-એ-મોહમ્મદ (JeM) ના 23 આતંકવાદીઓને UAPA કાયદા હેઠળ સત્તાવાર રીતે 'નિયુક્ત આતંકવાદી' જાહેર કર્યા છે. આ યાદીમાં 16 પાકિસ્તાની નાગરિકો અને સાત ભારતીયોનો સમાવેશ થાય છે, જેઓ લાંબા સમયથી ભારત વિરુદ્ધ આતંકવાદી ભરતી, શસ્ત્રોની દાણચોરી અને ઘૂસણખોરી જેવી ગંભીર પ્રવૃત્તિઓમાં સક્રિય હતા.
આ 23 આતંકવાદીઓમાંથી 13 લશ્કર-એ-તૈયબા અને 10 જૈશ-એ-મોહમ્મદ સાથે જોડાયેલા છે. જેમાં સૈફુલ્લાહ ખાલિદ અને હાફિઝ અબ્દુર રઉફ જેવા કુખ્યાત આતંકવાદીઓના નામ મુખ્ય છે, જેઓ વૈશ્વિક સ્તરે પણ વોન્ટેડ છે. જેશના કમાન્ડરો મુફ્તી અસગર ખાન અને મસૂદ ઇલ્યાસ કાશ્મીરી, જેઓ હુમલાઓનું આયોજન અને સોશિયલ મીડિયા દ્વારા યુવાનોને કટ્ટરપંથી બનાવવાનું કામ કરી રહ્યા હતા, તેમની સામે પણ સરકારે કડક વલણ અપનાવ્યું છે.
ભરતીના મોટા કૌભાંડમાં સોફ્ટવેર એન્જિનિયર મોહમ્મદ શાહેદ ફૈઝલ જેવો આરોપી પણ સામેલ છે, જે ઓનલાઈન માધ્યમથી બોમ્બ બનાવવા અને હુમલા કરવા માટે યુવાનોને તૈયાર કરતો હતો. આ તમામ આતંકવાદીઓ સામે દેશભરમાં વોરંટ પેન્ડિંગ છે અને તેમની આતંકવાદી ગતિવિધિઓ સતત પોલીસ તપાસ હેઠળ હતી. આ કાયદાકીય કાર્યવાહી દ્વારા ભારત હવે આતંકવાદી માળખાને જડમૂળથી ઉખેડી નાખવાનો પ્રયાસ કરી રહ્યું છે.
આ યાદી જાહેર કરવાનો મુખ્ય ઉદ્દેશ્ય આતંકવાદી સંગઠનોની આર્થિક અને સામાજિક કમર તોડવાનો છે. આંતરરાષ્ટ્રીય સ્તરે પણ ભારતના રાજદ્વારી પ્રયાસોને લીધે ટીઆરએફ (TRF) જેવા સંગઠનો પર પ્રતિબંધ મુકાયો છે. સરકારની આ શૂન્ય સહિષ્ણુતા નીતિ બાદ હવે આગામી સમયમાં આતંકવાદીઓ વિરુદ્ધ વધુ આક્રમક કાર્યવાહી અને વૈશ્વિક દબાણ વધવાની શક્યતા છે, જેથી ભારતની સરહદો વધુ સુરક્ષિત બનાવી શકાય.