નવી દિલ્હી: વૈશ્વિક બજારમાં ક્રૂડ ઓઇલના વધતા ભાવ અને ઈરાન-અમેરિકા યુદ્ધના જોખમો વચ્ચે ભારત સરકારે 'ઇલેક્ટ્રિક હાઇવે'ના પરીક્ષણો તેજ કર્યા છે. ભારત પોતાની જરૂરિયાતનું મોટાભાગનું તેલ આયાત કરે છે, જે અર્થતંત્ર પર મોજું છે. આ નિર્ભરતા ઘટાડવા માટે હવે શહેરો બાદ લાંબા અંતરના હાઇવે પર ઇલેક્ટ્રિક વાહનો (EV) માટે હાઇ-સ્પીડ ચાર્જિંગ કોરિડોર બનાવવાની રણનીતિ પર કામ ચાલી રહ્યું છે.

આ યોજના હેઠળ હાઇવે પર સૌર અને પવન ઉર્જાથી ચાલતા ચાર્જિંગ સ્ટેશનો સ્થાપવામાં આવશે. નીતિ આયોગના અંદાજ મુજબ, જો 2030 સુધીમાં 20% વાહનો ઇલેક્ટ્રિક થઈ જાય, તો અંદાજે 6 કરોડ વાહનો પેટ્રોલ-ડીઝલ વગર દોડશે. સૌથી વધુ ઇંધણ વાપરતી ટ્રકો અને બસોને આ ટેકનોલોજી સાથે સાંકળવાથી પરિવહન ખર્ચમાં ધરખમ ઘટાડો થશે અને સામાન્ય જનતાને મોંઘવારીમાંથી રાહત મળશે.

નેશનલ હાઇવે ફોર ઇલેક્ટ્રિક વાહનોના નિષ્ણાતો મુજબ, આ માત્ર પર્યાવરણીય સુધારો નથી પણ ભારતની ઊર્જા સુરક્ષા માટેનું મોટું કદમ છે. આ સિસ્ટમ કાર્યરત થવાથી આંતરરાષ્ટ્રીય તેલ પુરવઠો ખોરવાય તો પણ દેશનું પરિવહન અટકશે નહીં. હાઇવે પર નિયમિત અંતરે સુવિધાઓ મળવાથી લાંબા અંતરની મુસાફરી સસ્તી અને ઝડપી બનશે, જે ભવિષ્યમાં ખાનગી વાહનો માટે પણ વરદાન સાબિત થશે.