નવી દિલ્‍હી, તા.૨: પﾍમિ એશિયામાં ઈરાન અને અમેરિકા વચ્‍ચે વધતા જતા લશ્‍કરી તણાવને કારણે સમગ્ર વિશ્વમાં ઉર્જા સંકટ ઘેરું બન્‍યું છે, ત્‍યારે ભારત માટે એક અત્‍યંત રાહતના સમાચાર સામે આવ્‍યા છે. વિશ્વના સૌથી વ્‍યૂહાત્‍મક દરિયાઈ માર્ગ ગણાતા હોર્મુઝ સ્‍ટ્રેટમાં જ્‍યાં વૈશ્વિક શિપિંગ ટ્રાફિક લગભગ શૂન્‍ય થઈ ગયો છે, ત્‍યાં ભારતનું વિશાળકાય ગેસ ટેન્‍કર સર્વ શક્‍તિ આશરે ૪૫,૦૦૦ ટન લિક્‍વિફાઇડ પેટ્રોલિયમ ગેસ લઈને ભારત આવવા રવાના થયું છે. માર્શલ આઇલેન્‍ડ્‍સનો ધ્‍વજ ધરાવતું આ જહાજ ઈરાની ટાપુઓ લારાક અને કેશ્‍મ નજીકથી અત્‍યંત જોખમી માર્ગે પસાર થઈ રહ્યું છે. આ જહાજ પર ભારતીય ક્રૂ મેમ્‍બર્સની હાજરીને સુરક્ષાના દૃષ્ટિકોણથી એક સેફ પેસેજ તરીકે જોવામાં આવી રહી છે, જે ભારતની મજબૂત રાજદ્વારી પકડનો પુરાવો આપે છે.

ઇન્‍ડિયન ઓઇલ કોર્પોરેશન દ્વારા ખરીદાયેલ આ કાર્ગો ભારતની વર્તમાન ગેસ કટોકટીમાં સંજીવની સમાન સાબિત થશે. ઉલ્લેખનીય છે કે, અમેરિકાની નાકાબંધી અને ઈરાની સૈન્‍યની આક્રમકતાને કારણે હોર્મુઝના માર્ગે ઈંધણનો સપ્‍લાય ખોરવાતા ભારતમાં એલપીજી સિલિન્‍ડરની ભારે અછત સર્જાઈ હતી, જેના કારણે રસોડાના બજેટથી લઈને સપ્‍લાય ચેઈન સુધી બધું જ અસ્‍તવ્‍યસ્‍ત થઈ ગયું હતું. જો સર્વ શક્‍તિ આ સામુદ્રધુનીને સુરક્ષિત રીતે પાર કરી લેશે, તો તે પ્રતિબંધો પછી ભારત માટેનો પ્રથમ સફળ માર્ગ ગણાશે. આ ઓપરેશન દરમિયાન ભારતીય નૌકાદળ અને વિદેશ મંત્રાલય સતત જહાજના લોકેશન પર નજર રાખી રહ્યા છે, કારણ કે આ ક્ષેત્રમાં ઈલેક્‍ટ્રોનિક જામિંગ અને ડ્રોન હુમલાનું જોખમ હજુ પણ તોળાઈ રહ્યું છે.

ભારત સરકાર આ સંકટને પહોંચી વળવા માટે યુદ્ધના ધોરણે કામ કરી રહી છે. પેટ્રોલિયમ મંત્રી હરદીપ સિંહ પુરીના જણાવ્‍યા મુજબ, ભારતે સ્‍થાનિક ઉત્‍પાદનમાં ૬૦% નો વધારો કરીને તેને દૈનિક ૫૪,૦૦૦ ટન સુધી પહોંચાડ્‍યું છે, છતાં મધ્‍ય પૂર્વના દેશો પરની આયાત નિર્ભરતાને કારણે આંતરરાષ્‍ટ્રીય જહાજોનું આગમન અનિવાર્ય છે. ભારતની આ વ્‍યૂહાત્‍મક સફળતા પાછળ આઠ જેટલા એલપીજી ટેન્‍કરોને અગાઉ સફળતાપૂર્વક બહાર કાઢવાનો અનુભવ પણ કામ કરી રહ્યો છે. સર્વ શક્‍તિની આ ૧૦ થી ૧૪ કલાકની જોખમી યાત્રા માત્ર ભારતના કરોડો સ્‍ટવને સળગતા રાખશે એટલું જ નહીં, પણ વૈશ્વિક બજારમાં ભારતની ઉર્જા સુરક્ષાની ક્ષમતાનો ડંકો પણ વગાડશે. આ સફળતા બાદ આગામી દિવસોમાં ગેસ વિતરણ વ્‍યવસ્‍થા ફરીથી પાટા પર આવે તેવી પૂરેપૂરી શકયતા છે.