ન્યુ યોર્ક, તા.૦૭: સંયુક્ત રાષ્ટ્ર (UN) જનરલ એસેમ્બલીની છઠ્ઠી સમિતિની બેઠક દરમિયાન ભારતે જમ્મુ અને કાશ્મીર અંગે OIC દ્વારા કરવામાં આવેલી ટિપ્પણી અને પાકિસ્તાનમાં સ્થિત આતંકવાદી માળખા વિરુદ્ધ ભારતે લીધેલા પગલાંઓની આકરી ટીકાને સખત શબ્દોમાં નકારી કાઢી છે. પશ્ચિમ ત્રિપુરાના લોકસભા સાંસદ બિપ્લબ કુમાર દેબે ભારતનું રાષ્ટ્રીય નિવેદન આપતા જણાવ્યું હતું કે આ જૂથ હકીકતો અને કાલ્પનિક વાતો વચ્ચેનો તફાવત ભૂલીને પીડિત અને ગુનેગારની ઓળખ કરવામાં ભૂલ કરી રહ્યું છે.

યુનાઇટેડ નેશન્સ ખાતે પાકિસ્તાનના મુદ્દે ઓર્ગેનાઇઝેશન ઓફ ઇસ્લામિક કોઓપરેશન (OIC) દ્વારા આપવામાં આવેલા નિવેદન સામે ભારતે આકરા શબ્દોમાં વિરોધ નોંધાવ્યો છે. ભારતે સ્પષ્ટ શબ્દોમાં જણાવ્યું છે કે આંતરરાષ્ટ્રીય મંચો પર આવા સંગઠનો પીડિત અને ગુનેગાર વચ્ચેનો ભેદ પારખવામાં નિષ્ફળ સાબિત થઈ રહ્યા છે.

ભારતીય પ્રતિનિધિએ પાકિસ્તાન અધિકૃત કાશ્મીર (PoK) માં આવેલા રાવલકોટ અને અન્ય વિસ્તારોમાં થઈ રહેલા અત્યાચારો તરફ દુનિયાનું ધ્યાન દોર્યું હતું. તેમણે જણાવ્યું હતું કે OIC એ પાકિસ્તાનના ગેરકાયદેસર કબજા અને ત્યાંના નાગરિકોના મૂળભૂત માનવ અધિકારોના હનન પર ધ્યાન આપવું જોઈએ. PoK માં વિવાદાસ્પદ શરણાર્થી બેઠકોને લઈને થઈ રહેલા વિરોધ પ્રદર્શનો અને સુરક્ષા દળો દ્વારા દમનની ઘટનાઓ પર અંધાપો સેવવો તે કટ્ટરતા અને અસહિષ્ણુતાનું પ્રતીક છે.

સૌદી અરેબિયા દ્વારા યુએન ખાતે OIC વતી રજૂ કરવામાં આવેલા નિવેદનમાં ભારતનું નામ લીધા વગર સૈન્ય વૃદ્ધિ અને પાકિસ્તાન પરના હુમલાઓનો ઉલ્લેખ કરવામાં આવ્યો હતો. તેનો જવાબ આપતા ભારતે યાદ અપાવ્યું કે એપ્રિલ ૨૦૨૫માં પહેલગામ ખાતે નિર્દોષ પ્રવાસીઓ અને નાગરિકો પર થયેલા આતંકવાદી હુમલા પછી ભારતે પોતાની સાર્વભૌમત્વની રક્ષા માટે કડક પગલાં લીધા હતા. લશ્કર-એ-તૈયબાના પ્રોક્સી સંગઠન દ્વારા આયોજિત આ હુમલો ભારતની સુરક્ષા પર સીધો ઘા હતો.

ભારતે પોતાના વલણમાં સ્પષ્ટ કર્યું છે કે આતંકવાદનું કોઈ સ્વરૂપ સારું કે ખરાબ હોતું નથી અને માનવતા વિરુદ્ધના આ અપરાધ સામે કોઈ વાજબીપણું ચાલી શકે નહીં. સરહદ પારથી મળતા સમર્થન અને સુરક્ષિત આશ્રયસ્થાનોને કારણે દાયકાઓથી ભારતના નાગરિકો આતંકવાદનો ભોગ બની રહ્યા છે. દેશ પોતાના લોકોના રક્ષણ માટે કોઈપણ હદ સુધી જવા માટે તૈયાર છે અને આતંકવાદીઓને તેના ગંભીર પરિણામો ભોગવવા જ પડશે.

આંતરરાષ્ટ્રીય મંચ પર ભારતે વૈશ્વિક સ્તરે આતંકવાદનો ખાતમો બોલાવવા માટે ૧૯૯૬માં પ્રસ્તાવિત 'આંતરરાષ્ટ્રીય આતંકવાદ પર વ્યાપક સંમેલન' (CCIT) ને વહેલી તકે અપનાવવાની માંગ દોહરાવી હતી. ગત મહિને યોજાયેલા બ્રિક્સ શિખર સંમેલનમાં પણ નવી દિલ્હી ઘોષણાપત્ર દ્વારા આતંકવાદની તમામ ઘટનાઓની સખત નિંદા કરવામાં આવી હતી અને તેને સંપૂર્ણપણે ગેરકાયદેસર ગણાવવામાં આવ્યું હતું.

આગામી સમયમાં ભારત આતંકવાદ વિરુદ્ધ વૈશ્વિક સહયોગ વધારવા અને સરહદ પારના પ્રાયોજકોને બેનકાબ કરવા માટે આંતરરાષ્ટ્રીય મંચો પર પોતાની રણનીતિ વધુ આક્રમક બનાવશે તેમ માનવામાં આવી રહ્યું છે.