ભારતીય વાયુસેનાની હવાઈ સંરક્ષણ ક્ષમતાને વધુ ઘાતક બનાવવાની દિશામાં એક મોટું પગલું ભરવામાં આવ્યું છે. રશિયા દ્વારા નિર્મિત અત્યાધુનિક S-400 સુદર્શન એર ડિફેન્સ સિસ્ટમનું ચોથું સ્ક્વોડ્રન સુરક્ષિત રીતે ભારતમાં આવી પહોંચ્યું છે. સંરક્ષણ સૂત્રોના જણાવ્યા અનુસાર, સમુદ્રી માર્ગે થોડા દિવસો પહેલા જ આ સિસ્ટમ ભારત પહોંચી છે અને તેને ટૂંક સમયમાં જ સરહદ પર તૈનાત કરવાની પ્રક્રિયા હાથ ધરવામાં આવશે.

ભારત અને રશિયા વચ્ચે વર્ષ 2018 માં થયેલા સંરક્ષણ કરાર મુજબ, ભારતને કુલ પાંચ S-400 સ્ક્વોડ્રન મળવાના હતા. આ અંતર્ગત અગાઉ ત્રણ સ્ક્વોડ્રન ભારતને મળી ચૂક્યા છે, પરંતુ રશિયા-યુક્રેન યુદ્ધને કારણે બાકીના બે સ્ક્વોડ્રનના આગમનમાં વિલંબ થયો હતો. હવે ચોથા સ્ક્વોડ્રનના આગમનથી ભારતીય આકાશ વધુ સુરક્ષિત બન્યું છે. સંરક્ષણ સંપાદન પરિષદ - DAC] એ અગાઉ જ વધુ પાંચ સ્ક્વોડ્રન ખરીદવાની મંજૂરી આપી દીધી છે, જે ભવિષ્યમાં ભારતની સુરક્ષા કવચને વધુ અભેદ્ય બનાવશે.

S-400 સુદર્શન પ્રણાલીની મારક ક્ષમતા અજોડ છે. ઓપરેશન દરમિયાન આ પ્રણાલીએ 300 કિમીથી વધુ દૂર રહેલા પાકિસ્તાની સર્વેલન્સ વિમાનને નિશાન બનાવીને પોતાની તાકાત સાબિત કરી હતી. આ સાથે જ ભારત પોતાની સ્વદેશી હવાઈ સંરક્ષણ ક્ષમતા વધારવા માટે 'પ્રોજેક્ટ કુશા' પર પણ ધ્યાન કેન્દ્રિત કરી રહ્યું છે. ભારતીય સંરક્ષણ કંપની સોલાર ઇન્ડસ્ટ્રીઝના સહયોગથી વિકસાવવામાં આવી રહેલી આ પ્રણાલી દુશ્મનના ડ્રોન અને મિસાઈલ હુમલાઓને લાંબા અંતરથી જ નિષ્ક્રિય કરવા માટે સક્ષમ હશે. હવે પાકિસ્તાન અને ચીન જેવા દુશ્મનોની ખેર નથી.