​નવી દિલ્હી: ​વૈશ્વિક મંચ પર ભારતની અગ્રણી ભૂમિકાને વધુ સુદ્રઢ અને પ્રભાવશાળી બનાવવાના હેતુથી આગામી ઓગસ્ટ અને સપ્ટેમ્બર મહિના દરમિયાન દેશના વડાપ્રધાન નરેન્દ્ર મોદી એક અત્યંત વ્યસ્ત અને ઐતિહાસિક રાજદ્વારી સફર ખેડવા જઈ રહ્યા છે. આ બે મહિના દરમિયાન આંતરરાષ્ટ્રીય સ્તરે ભારતના હિતોનું રક્ષણ કરવા અને દ્વિપક્ષીય સંબંધોને નવી ઊંચાઈઓ પર લઈ જવા માટે પીએમ મોદી એકસાથે અનેક વૈશ્વિક શિખર સંમેલનોમાં ભાગ લેશે તથા ભારત વૈશ્વિક મહાસત્તાઓની યજમાની પણ કરશે.

​રાજદ્વારી સૂત્રોના જણાવ્યા અનુસાર, વડાપ્રધાન નરેન્દ્ર મોદીના આ ઝંઝાવાતી આંતરરાષ્ટ્રીય શેડ્યૂલની શરૂઆત પાડોશી ક્ષેત્રથી થશે. વર્ષ ૨૦૨૬ની પ્રતિષ્ઠિત શાંઘાઈ સહયોગ સંગઠન (SCO) સમિટ આગામી ૩૧ ઓગસ્ટથી ૧ સપ્ટેમ્બર દરમિયાન કિર્ગિસ્તાનમાં યોજાવા જી રહી છે, જેમાં વડાપ્રધાન મોદી ઉપસ્થિત રહીને પ્રાદેશિક સુરક્ષા, આતંકવાદ વિરોધી અભિયાન અને પરસ્પર કનેક્ટિવિટી જેવા મહત્વના વિષયો પર ભારતનો દૃષ્ટિકોણ રજૂ કરશે. આ સમિટ પૂર્ણ થતાં જ પીએમ મોદીના રાજદ્વારી મિશનનો આગામી પડાવ નવી દિલ્હી રહેશે, જ્યાં ભારત ગૌરવપૂર્વક બ્રિક્સ (BRICS) શિખર સંમેલનની યજમાની કરવા જઈ રહ્યું છે. દિલ્હીમાં યોજાનારા આ મહાસંમેલનમાં સભ્ય દેશોના વડાઓ એકત્રિત થશે, જે વૈશ્વિક દક્ષિણ (Global South)ના દેશોના આર્થિક અને વ્યાપારિક હિતોને આગળ વધારવામાં ભગીરથ ભૂમિકા ભજવશે.

​ત્યારબાદ, સપ્ટેમ્બર મહિનાના ઉત્તરાર્ધમાં વડાપ્રધાન મોદી અમેરિકાના ન્યૂયોર્ક શહેરની મુલાકાત લેશે, જ્યાં તેઓ સંયુક્ત રાષ્ટ્ર મહાસભા (UNGA)ના વાર્ષિક સત્રને સંબોધિત કરશે. વિશ્વના આ સૌથી મોટા મંચ પરથી પીએમ મોદી વૈશ્વિક શાંતિ, આબોહવા પરિવર્તન, આર્થિક અસ્થિરતા અને સંયુક્ત રાષ્ટ્રની સુરક્ષા પરિષદમાં સુધારા જેવા જટિલ મુદ્દાઓ પર ભારતનો પક્ષ પ્રબળતાથી આંતરરાષ્ટ્રીય સમુદાય સમક્ષ મૂકશે તેવું માનવામાં આવી રહ્યું છે.

​આ પ્રવાસો અને યજમાનીના ગાળા દરમિયાન વડાપ્રધાન મોદી વિશ્વના અનેક પ્રભાવશાળી દેશોના રાષ્ટ્રીયાધ્યક્ષો સાથે ઉચ્ચ સ્તરીય દ્વિપક્ષીય બેઠકો યોજે તેવી પ્રબળ શક્યતાઓ સેવાઈ રહી છે. આ બેઠકોમાં મુખ્યત્વે દ્વિપક્ષીય વ્યાપારિક સુધારાઓ, વિદેશી રોકાણો આકર્ષવા, સંરક્ષણ ક્ષેત્રે ટેકનોલોજીનું આદાન-પ્રદાન, પ્રાદેશિક સુરક્ષા અને વ્યૂહાત્મક સહયોગ વધારવા જેવા મહત્વપૂર્ણ એજન્ડા પર ગહન ચર્ચાઓ કરવામાં આવશે તેમજ અનેક ક્ષેત્રોમાં ઐતિહાસિક કરારો અને સમજૂતી કરારો (MoUs) પર હસ્તાક્ષર થવાની પણ પૂરેપૂરી આશા છે. ટૂંકમાં, આગામી દિવસોમાં પીએમ મોદીનું આ વૈશ્વિક શેડ્યૂલ ભારતીય વિદેશ નીતિ અને રાજદ્વારી ક્ષેત્રે એક નવો અધ્યાય આલેખશે.