​નવી દિલ્હી: ભારતીય વિજ્ઞાન જગત માટે ગર્વ અને ઐતિહાસિક ક્ષણ સામે આવી છે. દેશના દિગ્ગજ સૈદ્ધાંતિક ભૌતિકવિજ્ઞાની (Theoretical Physicist) પ્રોફેસર અશોક સેનને વર્ષ ૨૦૨૬ના અત્યંત પ્રતિષ્ઠિત 'ઓસ્કાર ક્લેઈન મેડલ' (Oskar Klein Medal) થી સન્માનિત કરવામાં આવ્યા છે. આ સિદ્ધિ સાથે તેઓ આ વૈશ્વિક એવોર્ડ પ્રાપ્ત કરનાર પ્રથમ ભારતીય ભૌતિકવિજ્ઞાની બન્યા છે.

​બેંગલુરુ સ્થિત 'ઇન્ટરનેશનલ સેન્ટર ફોર થિયરેટિકલ સાયન્સિસ' (ICTS) દ્વારા આ વાતની સત્તાવાર જાહેરાત કરવામાં આવી હતી. આ પુરસ્કાર પ્રોફેસર સેનને સ્ટ્રિંગ થિયરી (String Theory), એસ-ડ્યુઆલિટી (S-duality) અને બ્લેક હોલ એન્ટ્રોપી ક્ષેત્રે આપેલા તેમના નોંધપાત્ર અને પાયાના પ્રદાન માટે આપવામાં આવ્યો છે.

​સ્ટોકહોમ યુનિવર્સિટી દ્વારા અપાય છે આ એવોર્ડ

સ્વીડનની પ્રખ્યાત સ્ટોકહોમ યુનિવર્સિટી અને રોયલ સ્વીડિશ એકેડેમી ઓફ સાયન્સિસની નોબેલ કમિટી ફોર ફિઝિક્સ દ્વારા સંયુક્ત રીતે ૧૯૮૮થી દર વર્ષે આ મેડલ એનાયત કરવામાં આવે છે. ભૌતિકશાસ્ત્રના ક્ષેત્રમાં અસાધારણ યોગદાન આપનાર વૈજ્ઞાનિકોને જ આ સન્માન મળે છે. આ પહેલાં આ એવોર્ડ સ્ટીફન હોકિંગ, પીટર હિગ્સ, ચેન-નિંગ યાંગ અને સ્ટીવન વેનબર્ગ જેવા નોબેલ વિજેતા દિಗ್ಗજોને મળી ચૂક્યો છે, જે આ એવોર્ડનું વૈશ્વિક મહત્વ દર્શાવે છે.

​સ્ટોકહોમ ખાતે આપ્યું સ્મારક વ્યાખ્યાન

આ સન્માન સમારોહ અંતર્ગત પ્રોફેસર અશોક સેને સ્ટોકહોમ યુનિવર્સિટીમાં “Gravity from Strings and Strings from Gravity” શીર્ષક હેઠળ એક વિશેષ મેમોરિયલ વ્યાખ્યાન પણ આપ્યું હતું, જેમાં તેમણે ગુરુત્વાકર્ષણ અને સ્ટ્રિંગ થિયરી વચ્ચેના સંબંધો પર પ્રકાશ પાડ્યો હતો.

​અગાઉ પણ મળી ચૂક્યા છે અનેક વૈશ્વિક પુરસ્કારો

પ્રોફેસર અશોક સેન હાલમાં બેંગલુરુના ICTS-ઇન્ફોસિસ માધવા ચેર પ્રોફેસર તરીકે સેવા આપી રહ્યા છે. બ્રહ્માંડના મૂળભૂત સિદ્ધાંતોને સમજવામાં તેમનું યોગદાન અદ્વિતીય રહ્યું છે. તેમને અગાઉ ભારત સરકાર દ્વારા વર્ષ ૨૦૧૩માં દેશના ત્રીજા સર્વોચ્ચ નાગરિક સન્માન 'પદ્મભૂષણ' તેમજ આંતરરાષ્ટ્રીય સ્તરે 'બ્રેકથ્રુ પ્રાઇઝ ઇન ફંડામેન્ટલ ફિઝિક્સ' અને 'ડિરાક મેડલ' જેવા ગૌરવવંતા પુરસ્કારોથી નવાજવામાં આવ્યા છે. ૧૯૯૮માં તેઓ 'રોયલ સોસાયટી'ના ફેલો પણ ચૂંટાયા હતા.

​પ્રોફેસર સેનની આ ઐતિહાસિક સિદ્ધિથી સમગ્ર દેશના વૈજ્ઞાનિક વર્તુળોમાં ખુશીની લહેર છવાઈ ગઈ છે અને સોશિયલ મીડિયા તેમજ શૈક્ષણિક સંકુલોમાં તેમને અભિનંદનનો ધોધ વહી રહ્યો છે.