નવી દિલ્‍હી તા.૨: એર ઇન્‍ડિયા દ્વારા ૧૬ જૂને બેઝિક ભાડા યોજના શરૂ કર્યા બાદ પસંદગીના સ્‍થાનિક રૂટ પર ભોજન ન ખરીદનારા મુસાફરોને સસ્‍તી ટિકિટ ઓફર કરવામાં આવી છે, ઇન્‍ડિગોએ બુધવાર, ૧ જુલાઈના રોજ ઇન્‍ડિગો લાઇટ નામની યોજના પણ શરૂ કરી છે. આ યોજના હેઠળ, જે મુસાફરો પાસે ચેક-ઇન લગેજ નથી અને ફક્‍ત કેબિન (હેન્‍ડ બેગેજ) સામાન છે તેઓ સસ્‍તી ટિકિટ મેળવી શકશે.

ઇન્‍ડિગોએ જણાવ્‍યું હતું કે આ યોજના હેઠળ બુકિગ ૧ જુલાઈથી શરૂ થયું હતું. આ યોજનાના ફાયદા ૧૫ જુલાઈથી શરૂ થશે. આ યોજના ફક્‍ત ઘરેલુ જ નહીં પણ આંતરરાષ્ટ્રીય ફલાઇટ્‍સ પર પણ લાગુ પડે છે. આ યોજના હેઠળ, જો કોઈ મુસાફર પાસે ૧૫ કિલો સુધીનું ચેક-ઇન બેગેજ ન હોય અને ફક્‍ત ૭ કિલો સુધીનું કેબિન બેગેજ હોય, તો તેઓ સસ્‍તી ટિકિટ માટે પાત્ર બનશે. આ યોજના ઇકોનોમી ક્‍લાસના મુસાફરો માટે શરૂ કરવામાં આવી છે.

ઇન્‍ડિગો લાઇટ ભાડા ફક્‍ત ઇન્‍ડિગોની ડાયરેક્‍ટ ચેનલો (વેબસાઇટ, મોબાઇલ એપ્‍લિકેશન અને સંપર્ક કેન્‍દ્ર) પર ઉપલબ્‍ધ રહેશે. તે ફક્‍ત નોન-સ્‍ટોપ, એટલે કે, ડોમેસ્‍ટિક અને ઇન્‍ટરનેશનલ રૂટ બંને પર સીધી ફલાઇટ્‍સ પર લાગુ થશે, પછી ભલે તે એક-માર્ગી, રાઉન્‍ડ-ટ્રીપ અથવા મલ્‍ટી-સિટી હોય. આ યોજના કનેક્‍ટિંગ ફલાઇટ્‍સ પર લાગુ થશે નહીં.

આનાથી ગ્રાહકોને સસ્‍તું બેઝ પ્રાઈસ મળશે. ઇન્‍ડિગોના ચીફ સ્‍ટ્રેટેજી ઓફિસર, આલોક સિંહે જણાવ્‍યું હતું કે ઇન્‍ડિગો લાઇટ એવા મુસાફરો માટે એક મોટું પગલું હશે જેઓ ઓછા સામાન સાથે મુસાફરી કરે છે. તેઓ ફક્‍ત તેમને જોઈતી સેવાઓ માટે ચૂકવણી કરવા માંગે છે.