કોલકાતા : સિગારેટનું સેવન કરતા દેશના કરોડો ગ્રાહકો માટે ફુગાવાનો વધુ એક આંચકો સામે આવ્યો છે, જ્યાં દેશની સૌથી મોટી સિગારેટ ઉત્પાદક કંપની આઈટીસી (ITC) દ્વારા તેની લોકપ્રિય બ્રાન્ડ 'ગોલ્ડ ફ્લેક'ના ભાવમાં વધારો કરવામાં આવ્યો છે. કંપની દ્વારા ગોલ્ડ ફ્લેક RSFT (69 mm) ના એક પેકની કિંમતમાં રૂ. ૧૦ નો સીધો વધારો ઝીંકાયો છે. આ ભાવ ફેરફારને કારણે દૈનિક ગ્રાહકોના ખિસ્સા પર વધારાનો બોજ પડવો નક્કી છે.

સિગારેટના ભાવમાં કરાયેલા આ વધારાના ગણિત પર નજર કરીએ તો, ગોલ્ડ ફ્લેક RSFT ની કિંમતમાં થયેલો આ રૂ. ૧૦ નો વધારો આશરે ૮ ટકા જેટલો થાય છે. આ કિંમત સુધારા પહેલાં બજારમાં ગોલ્ડ ફ્લેક RSFT નું એક પેક રૂ. ૧૨૫ માં ઉપલબ્ધ થતું હતું, જે હવે આઈટીસીના નવા દરો લાગુ થતાં જ રૂ. ૧૩૫ ની કિંમતે રિટેલ માર્કેટમાં મળશે.

આ અગાઉ પણ કાચા માલની વધતી પડતર અને સરકારી કરમાળખામાં ફેરફારોને કારણે એફએમસીજી અને સિગારેટ ઉત્પાદક કંપનીઓ દ્વારા તબક્કાવાર ભાવવધારો કરવામાં આવતો રહ્યો છે. અગાઉના સમયમાં બજેટ દરમિયાન એક્સાઇઝ ડ્યુટી અને જીએસટી દર સબંધી ફેરફારો બાદ સિગારેટ બ્રાન્ડ્સના ભાવ વધારવામાં આવ્યા હતા, જેની અસર માર્કેટ શેર અને વેચાણ પર જોવા મળી હતી.

સરકાર દ્વારા તમાકુ ઉત્પાદનો પર કરભારણ વધારીને તેમજ કંપનીઓ દ્વારા ઉત્પાદન ખર્ચ સામે કિંમતો ઊંચી લઈ જઈને મોંઘવારીનો બોજ ગ્રાહકો પર નાખવામાં આવી રહ્યો છે. બજાર વિશ્લેષકોના જણાવ્યા મુજબ, ગોલ્ડ ફ્લેક જેવી મુખ્ય બ્રાન્ડમાં ૮ ટકાનો આ વધારો આઈટીસીની નફાકારકતા જાળવી રાખવા માટે કરાયો છે, પરંતુ આગામી દિવસોમાં આઈટીસીની અન્ય પ્રીમિયમ તથા રેગ્યુલર સિગારેટ બ્રાન્ડ્સના ભાવમાં પણ આવો જ વધારો થાય છે કે કેમ તેના પર માર્કેટ નિષ્ણાતો અને ગ્રાહકોની નજર રહેશે.