મુંબઈ: વડાપ્રધાન નરેન્દ્ર મોદીએ દેશના વિદેશી હૂંડિયામણ અને ઇંધણ બચાવવા માટે જે 'આત્મનિર્ભર' મંત્ર આપ્યો છે, તેનો અમલ મહારાષ્ટ્ર સરકારે પાયાના સ્તરે શરૂ કરી દીધો છે. આ વર્ષે ફ્રાન્સના કાન્સ ફિલ્મ ફેસ્ટિવલમાં મહારાષ્ટ્રના સરકારી પ્રતિનિધિઓની ચમક જોવા મળશે નહીં, કારણ કે સરકારે ખર્ચ બચાવવા માટે આ પ્રવાસ રદ કરવાનો મોટો નિર્ણય લીધો છે. પીએમની અપીલને માન આપીને હવે રાજ્યના તમામ વિભાગોમાં કામકાજની પદ્ધતિ બદલાઈ રહી છે. હવે મંગળવારથી સરકારી ફાઈલો અને મિટિંગો સોફા કે ઓફિસની ખુરશી પરથી જ 'વર્ચ્યુઅલ' માધ્યમથી ચાલશે, જેથી પ્રવાસ પાછળ થતો લાખોનો ધુમાડો અટકાવી શકાય.

વાહનવ્યવહારના ક્ષેત્રમાં પણ મહારાષ્ટ્ર સરકારે ક્રાંતિકારી ફેરફાર લાવવાની જાહેરાત કરી છે. હવેથી સરકારી કામકાજ માટે માત્ર ઇલેક્ટ્રિક વાહનો (EV) નો જ ઉપયોગ કરવામાં આવશે, જેથી પેટ્રોલ અને ડીઝલની આયાત પરનો બોજ ઘટાડી શકાય. પીએમ મોદીએ નાગરિકોને પણ ફરી એકવાર 'વર્ક ફ્રોમ હોમ' અને કારપૂલિંગ જેવી આદતો કેળવવા વિનંતી કરી છે, જે સીધી રીતે દેશના અર્થતંત્રને મજબૂત બનાવશે. લગ્ન પ્રસંગોમાં નવા સોનાના દાગીનાની ખરીદી એક વર્ષ ટાળવાની સલાહ પણ આ વ્યૂહરચનાનો જ એક ભાગ છે, જેનો હેતુ વિદેશી ચલણને દેશની બહાર જતું રોકવાનો છે.

જોકે, સરકારી પ્રતિનિધિઓની ગેરહાજરી છતાં કાન્સ ફિલ્મ ફેસ્ટિવલમાં મરાઠી સિનેમાનો ડંકો વાગતો રહેશે. આ વર્ષે 'માર્ચે ડુ ફિલ્મ' વિભાગમાં મહારાષ્ટ્રની બે વિશિષ્ટ ફિલ્મો - 'જીવ' (પ્રાણી) અને 'એપ્રિલ-મે 99' ની પસંદગી કરવામાં આવી છે. 'જીવ' ફિલ્મ કોંકણી આદિવાસી સમુદાયની અનોખી પરંપરાઓને વૈશ્વિક મંચ પર રજૂ કરશે, જ્યારે 'એપ્રિલ-મે 99' પ્રેક્ષકોને 90ના દાયકાની મીઠી યાદોમાં લઈ જશે. આમ, ભલે સરકારી બાબુઓ ફ્રાન્સ ન જાય, પણ મહારાષ્ટ્રની સંસ્કૃતિ અને કલા આંતરરાષ્ટ્રીય સ્તરે પોતાની હાજરી મજબૂતીથી નોંધાવશે.