વોશિંગ્ટન: રશિયાના તેલ શુદ્ધિકરણ મથકો ઉપર યુક્રેન હુમલા ચાલુ રાખશે તો અમેરિકા ગુપ્તચર માહિતી આપવાનો સહકાર બંધ કરી શકે છે એવી ચેતવણી અપાઈ હોવાનો અહેવાલ સામે આવ્યો છે. મિયામીમાં અમેરિકન પ્રતિનિધિઓ અને યુક્રેનના વાટાઘાટકારો વચ્ચેની ચર્ચા દરમિયાન આ મુદ્દો ઉઠ્યો હોવાનું જણાવાયું છે.

આ ઘટનાક્રમ અમેરિકાએ રશિયા સાથે ડીઝલ પુરવઠાની સમજૂતી કર્યા પછી સામે આવ્યો છે. યુક્રેન રશિયાનાં ઊર્જા મથકો ઉપરના હુમલાને મોસ્કોની યુદ્ધસંબંધિત આવક અને પુરવઠાને નબળા પાડવાનું સાધન ગણાવે છે. બીજી તરફ અમેરિકન પક્ષે આવા હુમલાઓની વૈશ્વિક ડીઝલ પુરવઠા ઉપરની અસર અંગે ચિંતા વ્યક્ત કરી હોવાનો અહેવાલ છે. 

અમેરિકાના રાષ્ટ્રપતિ ડોનાલ્ડ ટ્રમ્પે જાહેરમાં પણ યુક્રેનને રશિયન શુદ્ધિકરણ મથકો ઉપર હુમલા બંધ કરવા કહ્યું છે. જોકે ગુપ્તચર માહિતીનો પુરવઠો ખરેખર બંધ કરી દેવાયો છે એવી પુષ્ટિ ઉપલબ્ધ નથી. હાલનો ઘટનાક્રમ સહકાર રોકવાની ચેતવણી અંગેનો છે. યુક્રેનના રાષ્ટ્રપતિ ઝેલેન્સ્કીએ રશિયાને ઊર્જા વેચાણમાં રાહત આપવાના નિર્ણયનો વિરોધ કર્યો છે. તેમણે આ પગલાથી રશિયાને યુદ્ધ ચાલુ રાખવા વધુ નાણાં મળશે એવો અભિપ્રાય વ્યક્ત કર્યો છે.