જયપુર : રાજસ્થાનમાં ગરમીનો પારો સતત ઉપર ચઢી રહ્યો છે, જેના પગલે રાજ્યના પાંચ જિલ્લાઓ માટે હવામાન વિભાગે 'ઓરેન્જ એલર્ટ' જારી કર્યું છે. જોધપુર, બિકાનેર અને કોટા વિભાગના વિસ્તારો તેમજ શેખાવતી ક્ષેત્રમાં સ્થિતિ વધુ ગંભીર બની છે. આગામી દિવસોમાં મહત્તમ તાપમાન 46 ડિગ્રી સેલ્સિયસને આંબી શકે તેવી ભીતિ સેવાઈ રહી છે, જેને ધ્યાનમાં રાખીને તંત્ર એલર્ટ મોડ પર આવી ગયું છે.
રાત્રિના સમયે પણ ગરમીથી નથી છુટકારો
માત્ર દિવસ જ નહીં, પરંતુ રાજસ્થાનની રાત પણ અસામાન્ય રીતે ગરમ બની રહી છે. રાજ્યના જયપુર, કોટા, જોધપુર, નાગૌર, બિકાનેર અને દૌસા જેવા મુખ્ય શહેરોમાં લઘુત્તમ તાપમાન પણ 30 ડિગ્રી સેલ્સિયસની સપાટીને વટાવી ગયું છે. ખાસ કરીને કોટામાં તો લઘુત્તમ તાપમાન 33 ડિગ્રી સેલ્સિયસ સુધી પહોંચી જતાં તે રાજ્યનું સૌથી ગરમ શહેર બની ગયું છે. આ સ્થિતિને કારણે સામાન્ય જનજીવન ભારે અગવડતાનો સામનો કરી રહ્યું છે.
વહીવટીતંત્ર દ્વારા રાહત માટેના યુદ્ધના ધોરણે પ્રયાસો
તીવ્ર ગરમી અને ગરમ પવનો (લૂ) ના કારણે ઉદભવેલી સ્થિતિને પહોંચી વળવા માટે સ્થાનિક વહીવટીતંત્રે વિવિધ રાહત પગલાં અમલમાં મૂક્યા છે. રસ્તાઓ પર પાણીનો છંટકાવ કરવામાં આવી રહ્યો છે, જેથી ગરમ પવનોની અસર ઘટાડી શકાય. આ ઉપરાંત, જાહેર સ્થળોએ પીવાના પાણીની સુવિધા સુનિશ્ચિત કરવા સાથે જરૂરિયાતમંદ લોકો માટે કામચલાઉ આશ્રયસ્થાનો પણ ઉભા કરવામાં આવ્યા છે. વહીવટીતંત્રે નાગરિકોને બપોરના સમયે ઘરની બહાર નીકળવાનું ટાળવા અને પૂરતા પ્રમાણમાં પાણી પીવા જેવી સલાહ પણ આપી છે.