જયપુર | તા.31: રાજસ્થાન કોંગ્રેસમાં લાંબા સમયથી ચાલી આવતી જૂથબંધી અને વર્ચસ્વની લડાઈ ફરી એકવાર ખુલ્લેઆમ સામે આવી છે. જોકે, આ વખતે આ વિવાદ ભૂતપૂર્વ મુખ્યમંત્રી અશોક ગેહલોત અને સચિન પાયલટ વચ્ચે નહીં, પરંતુ પ્રદેશ કોંગ્રેસ પ્રમુખ ગોવિંદ સિંહ દોટાસરા અને અશોક ગેહલોત વચ્ચે સર્જાયો છે. ગેહલોતના નિવાસસ્થાને કેટલાક કાર્યકરો દ્વારા તેમને ચોથી વાર મુખ્યમંત્રી બનાવવાની નારેબાજી અને કથિત 'બ્રાન્ડિંગ' સામે દોટાસરાએ અસાધારણ રીતે આકરા પ્રહારો કર્યા છે, જે રાજસ્થાનના રાજકારણમાં શક્તિ સંતુલન બદલાઈ રહ્યાના સ્પષ્ટ સંકેતો આપે છે.

હકીકતમાં, પૂર્વ કેબિનેટ મંત્રી મહેન્દ્રજીત સિંહ માલવિયાના નેતૃત્વમાં ભારતીય આદિવાસી પાર્ટી (BAP) ના લગભગ 100 જેટલા કાર્યકરો કોંગ્રેસમાં જોડાયા હતા. આ કાર્યકરો પ્રદેશ કાર્યાલય જતાં પહેલાં અશોક ગેહલોતના નિવાસસ્થાને પહોંચ્યા હતા અને "હમારા મુખ્યમંત્રી કૈસા હો, અશોક ગેહલોત જયસા હો" તથા "ચૌથી બાર ગેહલોત સરકાર" ના નારા લગાવ્યા હતા. ત્યારબાદ જ્યારે તેઓ પ્રદેશ કાર્યાલય પહોંચ્યા ત્યારે દોટાસરાએ જાહેરમાં પોતાની નારાજગી વ્યક્ત કરી હતી. તેમણે સ્પષ્ટ શબ્દોમાં કહ્યું કે વ્યક્તિવિશેષના નારા લગાવવાથી પાર્ટીને હંમેશાં નુકસાન થયું છે અને એકવાર જીત્યા બાદ ફરીથી હારનો સામનો કરવો પડ્યો છે.

દોટાસરાનો તીખો પલટવાર: "હું અશોક ગેહલોત કે સચિન પાયલટ જેટલો મોટો નેતા નથી, પરંતુ હું પ્રદેશ કોંગ્રેસ પ્રમુખ છું અને સંગઠન ચલાવું છું. માલવિયા જેવા વરિષ્ઠ નેતાએ વિચારવું જોઈતું હતું કે તેઓ શું કરી રહ્યા છે. વ્યક્તિવાદને કારણે કોંગ્રેસને ઘણું નુકસાન થયું છે અને હું કોઈ એક વ્યક્તિ માટે નારેબાજી ચલાવીશ નહીં." - ગોવિંદ સિંહ દોટાસરા.

ઉલ્લેખનીય છે કે, છ વર્ષ પહેલાં જ્યારે સચિન પાયલટે બળવો કર્યો હતો ત્યારે અશોક ગેહલોતે જ દોટાસરાને પ્રદેશ પ્રમુખ બનાવવામાં મુખ્ય ભૂમિકા ભજવી હતી. પરંતુ હવે સતત ચોથી વાર મુખ્યમંત્રી બનવાની ગેહલોતની આકાંક્ષાઓ સામે પાર્ટીના અન્ય નેતાઓ એક થઈ રહ્યા હોય તેમ જણાય છે. દોટાસરાના આ આક્રમક વલણથી રાજસ્થાન કોંગ્રેસમાં એક નવો રાજકીય મોરચો ખૂલી ગયો છે.