રાજકોટ: તા.૦૬ પડોશી દેશ શ્રીલંકામાં આ વર્ષે સાયબર ક્રાઈમ વિરુદ્ધ હાથ ધરવામાં આવેલી એક મોટી ઝુંબેશમાં ભારતીયો સહિત ૬૦૦થી વધુ વિદેશી નાગરિકોની ધરપકડ કરવામાં આવી છે. શ્રીલંકા પોલીસે મંગળવારે જાહેર કર્યું હતું કે આંતરરાષ્ટ્રીય સ્તરે ડિજિટલ છેતરપિંડી આચરતી ગેંગના સભ્યો શ્રીલંકાને પોતાનો અડ્ડો બનાવી રહ્યા છે, જેના પર હવે કડક કાર્યવાહી શરૂ કરવામાં આવી છે.
જાન્યુઆરીથી અત્યાર સુધીમાં ૬૨૮ની ધરપકડ
શ્રીલંકા પોલીસના પ્રવક્તા એફ. ટી. વૂટલરે જણાવ્યું હતું કે, ૧ જાન્યુઆરી ૨૦૨૬થી અત્યાર સુધીમાં કુલ ૬૨૮ વિદેશીઓની ધરપકડ કરવામાં આવી છે. આ ધરપકડ કરાયેલા લોકોમાં ભારત ઉપરાંત ચીન, વિયેતનામ, મ્યાનમાર, ફિલિપાઈન્સ અને કંબોડિયાના નાગરિકોનો સમાવેશ થાય છે. આ તમામ લોકો કોલંબોના ઉપનગરોમાં રહીને વિદેશમાં વસતા લોકોને ડિજિટલ પ્લેટફોર્મ દ્વારા નિશાન બનાવતા હતા.
વિઝાની અવધિ પૂરી થયા બાદ પણ રોકાયા હતા
પોલીસ તપાસમાં બહાર આવ્યું છે કે ધરપકડ કરાયેલા મોટાભાગના લોકો ટૂંકા ગાળાના ટુરિસ્ટ વિઝા પર શ્રીલંકા આવ્યા હતા. વિઝાની મુદત પૂરી થઈ ગઈ હોવા છતાં તેઓ ગેરકાયદેસર રીતે ત્યાં રોકાઈને સાયબર ગુનાઓ આચરતા હતા. તાજેતરમાં જ પાડવામાં આવેલા દરોડામાં એકસાથે ૧૫૭ વિદેશીઓની ધરપકડ કરવામાં આવી છે. પોલીસને શંકા છે કે આ એક મોટા આંતરરાષ્ટ્રીય સિન્ડિકેટનો ભાગ છે જે વિશ્વભરમાં ફેલાયેલું છે.
સ્થાનિકોને પોલીસની કડક સૂચના
શ્રીલંકા પોલીસે સ્થાનિક નાગરિકોને ચેતવણી આપતા જણાવ્યું છે કે તેઓ જ્યારે પણ પોતાનું ઘર, એપાર્ટમેન્ટ કે બિઝનેસ યુનિટ ભાડે આપે, ત્યારે તેની જાણ નજીકના પોલીસ સ્ટેશનમાં કરવી ફરજિયાત છે. શ્રીલંકાની સરળ વિઝા પ્રક્રિયા અને ઈન્ટરનેટ કનેક્ટિવિટીનો લાભ લઈને આ ગુનેગારો ત્યાં આશ્રય લઈ રહ્યા છે. દરોડા દરમિયાન પોલીસે મોટી માત્રામાં કોમ્પ્યુટર્સ, મોબાઈલ ફોન્સ અને અન્ય ઈલેક્ટ્રોનિક ઉપકરણો કબજે કર્યા છે જેનો ઉપયોગ છેતરપિંડી માટે કરવામાં આવતો હતો.