અમદાવાદ: ક્રિકેટના ચાહકો માટે વર્ષના સૌથી મોટા પર્વ સમાન IPL 2026 ની ફાઈનલ મેચ હવે ગણતરીના કલાકો દૂર છે. અમદાવાદના નરેન્દ્ર મોદી સ્ટેડિયમમાં રોયલ ચેલેન્જર્સ બેંગ્લૂરુ (RCB) અને ગુજરાત ટાઈટન્સ (GT) વચ્ચે ખરાખરીનો જંગ ખેલાવાનો છે. જોકે, આ રોમાંચક મુકાબલા પર કુદરતની વક્રદ્રષ્ટિ હોય તેવું લાગી રહ્યું છે. હવામાન વિભાગે અમદાવાદમાં 'થન્ડર એક્ટિવિટી' એટલે કે ગાજવીજ સાથે વરસાદની આગાહી કરી છે, જેના કારણે કરોડો ક્રિકેટ રસિકોના દિલની ધડકન વધી ગઈ છે.
શું સ્ટેડિયમમાં ભીંજાશે ફેન્સની આશા?
હવામાન વિભાગના જણાવ્યા મુજબ, પ્રિ-મોન્સૂન એક્ટિવિટીના ભાગરૂપે અમદાવાદમાં વાતાવરણમાં મોટો પલટો આવ્યો છે. મેચ દરમિયાન તેજ પવન સાથે વરસાદ પડવાની સંભાવના વ્યક્ત કરવામાં આવી છે. સ્ટેડિયમમાં ટૉસની પ્રક્રિયાથી લઈને રમત સુધી દરેક ક્ષણ પર વરસાદનું જોખમ તોળાઈ રહ્યું છે. જો મેચ શરૂ થયા બાદ વરસાદ વિઘ્ન બને, તો આયોજકો માટે સમયનું મેનેજમેન્ટ કરવું એક મોટો પડકાર બની જશે.
વરસાદ પડે તો શું થશે? વિજેતા કોણ બનશે?
IPL ના નિયમો મુજબ, જો વરસાદના કારણે મેચમાં વિલંબ થાય તો વધારાનો 'બફર ટાઈમ' આપવામાં આવશે. જો ઓવરો ઘટાડીને પણ ઓછામાં ઓછી 5-5 ઓવરની મેચ કરાવવી શક્ય ન બને, તો નિર્ણય સુપર ઓવર દ્વારા લેવાનો પ્રયાસ થશે. પરંતુ જો હવામાન સાથ ન આપે અને સુપર ઓવર પણ ન થઈ શકે, તો પોઈન્ટ્સ ટેબલને ધ્યાનમાં લેવામાં આવશે. આ સંજોગોમાં લીગ સ્ટેજમાં ટોચ પર રહેલી રોયલ ચેલેન્જર્સ બેંગ્લૂરુ (RCB) ને ચેમ્પિયન જાહેર કરવામાં આવશે, જ્યારે ગુજરાત ટાઈટન્સ રનર્સ-અપ રહેશે.
કરોડો ફેન્સની એક જ પ્રાર્થના
અમદાવાદનું સ્ટેડિયમ ફાઈનલ માટે સજ્જ છે, ક્લોઝિંગ સેરેમનીની તમામ તૈયારીઓ પૂર્ણ થઈ ગઈ છે, પરંતુ હવે નજર માત્ર આકાશ તરફ છે. ક્રિકેટના આ રોમાંચક મુકાબલામાં વરુણ દેવ કોઈ અડચણ ન નાખે તેવી પ્રાર્થના કરોડો ચાહકો કરી રહ્યા છે. શું આજે RCB પ્રથમ વખત ટાઈટલ જીતશે કે ગુજરાત ટાઈટન્સ ફરી એકવાર બાજી મારશે? આ સવાલનો જવાબ તો મેદાન પર જ મળશે, જો હવામાન મહેરબાન રહેશે તો જ!