તેહરાન, તા. ૭ : ઈરાન સરકારે દર મહિને ૧૧૦ લિટરથી વધુ પેટ્રોલ વાપરતા વાહનચાલકો માટે ભાવવધારો જાહેર કર્યો છે. મંગળવારથી નિર્ધારિત મર્યાદા કરતાં વધુ પેટ્રોલનો ભાવ પ્રતિ લિટર એક લાખ ઈરાની રિયાલ વસૂલવામાં આવશે.

હાલ વાહનચાલકોને પ્રથમ ૬૦ લિટર પેટ્રોલ પ્રતિ લિટર ૧૫ હજાર રિયાલ અને ત્યારબાદના ૫૦ લિટર પ્રતિ લિટર ૩૦ હજાર રિયાલના ભાવે મળે છે. આ રીતે કુલ ૧૧૦ લિટર સુધીના બંને સબસિડીવાળા ભાવમાં ફેરફાર કરવામાં આવ્યો નથી. મર્યાદા પછીના ત્રીજા જથ્થાનો ભાવ જ વધારાયો છે.

સરકારે આ નિર્ણયને અમેરિકા સાથેના યુદ્ધ, આર્થિક પ્રતિબંધો, પેટ્રોલના વધતા વપરાશ અને સરકારી સબસિડીના બોજ સાથે જોડ્યો છે. ઈરાન વિશ્વમાં સૌથી સસ્તું પેટ્રોલ આપતા દેશોમાં સામેલ છે. જોકે વર્ષ ૨૦૧૯માં પેટ્રોલના ભાવવધારા પછી વ્યાપક વિરોધ થયો હોવાથી સરકાર આ વખતના અમલ અંગે સાવચેતી રાખી રહી છે.