મસ્કત, તા. ૨૭: પશ્ચિમ એશિયામાં વધી રહેલા તણાવ વચ્ચે દરિયાઈ માર્ગો હવે યુદ્ધના મેદાનમાં ફેરવાઈ રહ્યા હોય તેમ જણાય છે. ઈરાને ઓમાનના શિનાસ બંદર નજીક ટોગો (Togo) દેશનો ધ્વજ ધરાવતા એક કેમિકલ ટેન્કર 'MT ચિરોન' પર હુમલો કર્યો છે. આ જહાજ પર ૧૨ ભારતીય ક્રૂ સભ્યો સવાર હતા, જેના કારણે ભારત સરકાર અને ખલાસીઓના પરિવારોમાં ચિંતાની લહેર પ્રસરી ગઈ હતી. જોકે, લેટેસ્ટ રિપોર્ટ અનુસાર તમામ ભારતીય ક્રૂ સભ્યો સુરક્ષિત હોવાનું જાણવા મળ્યું છે.
હુમલાની ચોંકાવનારી વિગતો
આ ઘટના ત્યારે બની જ્યારે MT ચિરોન ટેન્કર અન્ય જહાજોના કાફલા સાથે દરિયામાં આગળ વધી રહ્યું હતું. ઓમાનના શિનાસના બાહ્ય બંદર વિસ્તાર નજીક ઈરાની કોસ્ટ ગાર્ડે અચાનક આ જહાજને અટકાવ્યું હતું. ઈરાની સુરક્ષા દળોએ જહાજ પર દબાણ લાવવા માટે ચેતવણીના અનેક રાઉન્ડ ફાયરિંગ કર્યા હતા. ગોળીબારના અવાજથી જહાજ પર સવાર કર્મચારીઓમાં ગભરાટ ફેલાઈ ગયો હતો. ત્યારબાદ ઈરાની દળોએ જહાજને પોતાની કસ્ટડીમાં લેવાનો પ્રયાસ કર્યો હોવાના અહેવાલો પણ પ્રાપ્ત થયા છે.
ભારત સરકારની સતર્કતા
ભારતીય શિપિંગ અને જળમાર્ગ મંત્રાલયે આ હુમલાને ગંભીરતાથી લીધો છે. મંત્રાલયના ડાયરેક્ટર મનદીપ સિંહ રંધાવાએ મીડિયાને માહિતી આપતા જણાવ્યું હતું કે, "અમે પર્શિયન ગલ્ફમાં રહેલા તમામ ભારતીય જહાજો અને આપણા ખલાસીઓ પર ૨૪ કલાક નજીકથી નજર રાખી રહ્યા છીએ. MT ચિરોન પર સવાર તમામ ૧૨ ભારતીયો હાલ સુરક્ષિત છે અને અમે તેમની સુરક્ષા માટે સંબંધિત દેશોના સત્તાવાળાઓ સાથે સતત સંપર્કમાં છીએ."
કેમ થયો હુમલો?
ઈરાન દ્વારા આ હુમલો શા માટે કરવામાં આવ્યો તેનું કોઈ સત્તાવાર કારણ હજુ જાહેર કરવામાં આવ્યું નથી. જોકે, છેલ્લા કેટલાક સમયથી ઈરાન અને પશ્ચિમી દેશો વચ્ચે ચાલી રહેલા સંઘર્ષને કારણે આ વિસ્તારમાં વેપારી જહાજોને નિશાન બનાવવાની ઘટનાઓ વધી રહી છે. ઈરાન વારંવાર આંતરરાષ્ટ્રીય જળસીમામાં જહાજોને અટકાવીને પોતાની તાકાતનું પ્રદર્શન કરતું આવ્યું છે.
પરિવારોમાં રાહતનો શ્વાસ
જહાજ પર ૧૨ ભારતીય હોવાની ખબર મળતા જ શિપિંગ સંગઠનોમાં દોડધામ મચી ગઈ હતી. પરંતુ ભારત સરકાર દ્વારા સત્તાવાર રીતે તમામ સભ્યો સુરક્ષિત હોવાની પુષ્ટિ કરવામાં આવતા પરિવારોએ રાહતનો શ્વાસ લીધો છે. હાલમાં જહાજ કઈ સ્થિતિમાં છે અને તેને આગળ જવા દેવામાં આવ્યું છે કે નહીં તે અંગેની રાજદ્વારી વાટાઘાટો ચાલી રહી છે. મંત્રાલયે ભારતીય ખલાસીઓને પર્શિયન ગલ્ફમાં સાવચેતી રાખવા અને ઈમરજન્સી પ્રોટોકોલનું પાલન કરવા સૂચના આપી છે.