​ઈસ્લામાબાદ: ​વૈશ્વિક રાજદ્વારી ગતિવિધિઓ વચ્ચે એક મહત્વપૂર્ણ ઘટનાક્રમમાં, સ્વિટ્ઝર્લેન્ડમાં અધૂરી રહેલી આંતરરાષ્ટ્રીય સ્તરની વાતચીત અને ડીલને આખરી ઓપ આપવા માટે ઈરાનના રાષ્ટ્રપતિ મસૂદ પેઝેશકિયન એક ઉચ્ચ સ્તરીય પ્રતિનિધિમંડળ સાથે પાકિસ્તાનની રાજધાની ઈસ્લામાબાદ પહોંચ્યા છે. ઈરાની રાષ્ટ્રપતિની આ મુલાકાતને વૈશ્વિક અને પ્રાદેશિક રાજકારણની દ્રષ્ટિએ અત્યંત મહત્વપૂર્ણ માનવામાં આવી રહી છે, કારણ કે આ પ્રવાસ દરમિયાન સ્વિટ્ઝર્લેન્ડની બેઠકોમાં અધૂરી રહી ગયેલી ચર્ચાઓને પાકિસ્તાનની ધરતી પર પૂરી કરવામાં આવી રહી છે.

​ઈસ્લામાબાદ પહોંચવા પર ઈરાનના રાષ્ટ્રપતિ મસૂદ પેઝેશકિયન અને તેમના વિદેશ મંત્રી અબ્બાસ અરાગચી સહિતના પ્રતિનિધિમંડળનું પાકિસ્તાન સરકાર દ્વારા ભવ્ય અને ઉષ્માભર્યું સ્વાગત કરવામાં આવ્યું હતું. આ દરમિયાન એરપોર્ટ પર એક અનોખો નજારો જોવા મળ્યો હતો, જે હાલમાં ભારે ચર્ચાનો વિષય બન્યો છે. પાકિસ્તાનના વડાપ્રધાન શાહબાઝ શરીફ મુત્સદ્દીગીરી અને સામાન્ય પ્રોટોકોલથી ઉપર ઉઠીને, જાતે જ ઈરાની રાષ્ટ્રપતિ મસૂદ પેઝેશકિયન માટે છતરી પકડીને ઉભેલા જોવા મળ્યા હતા. વરસાદી માહોલ વચ્ચે પાકિસ્તાની વડાપ્રધાન દ્વારા ઈરાનના રાષ્ટ્રપ્રમુખ પ્રત્યે દર્શાવવામાં આવેલો આ આદર અને અનોખો અંદાજ સોશિયલ મીડિયા પર ખૂબ વાયરલ થઈ રહ્યો છે અને તેને બંને દેશો વચ્ચેના ગાઢ બની રહેલા સંબંધોના પ્રતીક તરીકે જોવામાં આવી રહ્યો છે.

​આ ઉચ્ચ સ્તરીય મુલાકાત પાછળનું મુખ્ય કારણ સ્વિટ્ઝર્લેન્ડમાં પશ્ચિમી દેશો અને અમેરિકાના સંદર્ભમાં શરૂ થયેલી કેટલીક ગુપ્ત અને મહત્વની વાટાઘાટો હોવાનું મનાય છે. સ્વિટ્ઝર્લેન્ડની મધ્યસ્થતામાં ચાલી રહેલી આ પ્રક્રિયા ત્યાં કોઈ અંતિમ તારણ પર પહોંચી શકી નહોતી, જેને હવે પાકિસ્તાનમાં પૂર્ણ કરવામાં આવી રહી છે. આ મુલાકાત દરમિયાન ઈરાન અને પાકિસ્તાન વચ્ચે વેપાર, ઊર્જા, સરહદી સુરક્ષા અને પ્રાદેશિક સ્થિરતા સહિતના અનેક દ્વિપક્ષીય મુદ્દાઓ પર વિગતવાર ચર્ચા વિચારણા કરવામાં આવશે. અમેરિકા દ્વારા ઈરાન પર લાદવામાં આવેલા આર્થિક પ્રતિબંધો વચ્ચે પાકિસ્તાન સાથેની આ બેઠક અને સ્વિટ્ઝર્લેન્ડની અધૂરી કડીને જોડવાનો આ પ્રયાસ આગામી સમયમાં વૈશ્વિક રાજકારણમાં નવા સમીકરણો સર્જી શકે છે.