ઈસ્લામાબાદ: કિસ્તાનની રાજધાનીમાં અમેરિકા અને ઈરાન વચ્ચે ચાલી રહેલી હાઈ-વોલ્ટેજ રાજદ્વારી વાટાઘાટો બાદ ઈરાને અત્યંત આક્રમક વલણ અખત્યાર કર્યું છે. ઈરાનના વિદેશ મંત્રાલયના પ્રવક્તા ઈસ્માઈલ બકાઈએ સોશિયલ મીડિયા પર સત્તાવાર નિવેદન જારી કરીને સ્પષ્ટ કર્યું છે કે, તેમનો દેશ રાષ્ટ્રીય હિતોની સુરક્ષા માટે રાજદ્વારી સ્તર સહિતના તમામ સાધનોનો ઉપયોગ કરવા માટે કટિબદ્ધ છે. અમેરિકાના ઉપરાષ્ટ્રપતિ જે.ડી. વાન્સ સાથેની મંત્રણાના લાંબા અને વ્યસ્ત દોર બાદ ઈરાને અમેરિકાના ભૂતકાળના 'તૂટેલા વચનો' પર આકરા પ્રહારો કર્યા છે અને જણાવ્યું છે કે તેઓ પશ્ચિમી દેશોના ખરાબ ઈરાદાઓને ક્યારેય ભૂલી શકશે નહીં.
છેલ્લા 24 કલાકમાં થયેલી આ સઘન ચર્ચાઓમાં હોર્મુઝની સામુદ્રધુનીમાં સુરક્ષા, ઈરાનના પરમાણુ અધિકારો, યુદ્ધનું વળતર અને આર્થિક પ્રતિબંધો હટાવવા જેવા જટિલ મુદ્દાઓ કેન્દ્રસ્થાને રહ્યા હતા. ઈરાની વાટાઘાટકારોએ ભારપૂર્વક જણાવ્યું હતું કે, આ મંત્રણાની સફળતા સંપૂર્ણપણે અમેરિકાના ‘સદભાવ’ અને ગેરકાયદેસર વિનંતીઓ છોડવા પર નિર્ભર છે. નિવેદનમાં ઈરાની સંસ્કૃતિ અને ઈતિહાસનો હવાલો આપીને કહેવામાં આવ્યું છે કે, કોઈપણ પ્રકારનું દબાણ તેમને તેમના ઐતિહાસિક મિશન અને દેશના કલ્યાણના રક્ષણથી રોકી શકશે નહીં. ઈરાને આ રાજદ્વારી લડાઈને વતનના રક્ષકોના 'પવિત્ર જેહાદ' સમાન ગણાવી છે.
ઈસ્લામાબાદમાં મધ્યસ્થીઓની હાજરીમાં બંને પક્ષો વચ્ચે અનેક સંદેશાઓ અને ડ્રાફ્ટ્સની આપ-લે થઈ હોવા છતાં, હજુ સુધી કોઈ સર્વસંમતિ સધાઈ નથી. ઈરાને સ્પષ્ટ ચીમકી આપી છે કે તેઓ ઝાયોનિસ્ટ શાસન અને તેના સહયોગીઓ દ્વારા કરવામાં આવેલા ગુનાઓને માફ કરવા તૈયાર નથી. પ્રતિબંધોમાં રાહત અને પ્રદેશમાં યુદ્ધનો સંપૂર્ણ અંત લાવવાની માંગણી પર ઈરાન મક્કમ રહ્યું છે. હવે આંતરરાષ્ટ્રીય સમુદાયની નજર એ વાત પર ટકેલી છે કે શું અમેરિકા ઈરાનના કાયદેસર અધિકારો સ્વીકારીને આ મડાગાંઠ ઉકેલશે કે પછી ખાડી દેશોમાં અનિશ્ચિતતાનો આ દોર વધુ વકરશે.