ઈરાનના વિદેશ મંત્રી અબ્બાસ અરાઘચીએ ભારતને ચાબહાર પ્રોજેકટમાં રોકાણ ચાલુ રાખવા અને મધ્ય પૂર્વમાં શાંતિ સ્થાપવા માટે સક્રિય ભૂમિકા ભજવવા વિનંતી કરી છે. બ્રિક્સ વિદેશ મંત્રીઓની બેઠક બાદ તેમણે ભારતની રાજદ્વારી છબીની પ્રશંસા કરતા જણાવ્યું હતું કે, ભારત પર્સિયન ગલ્ફના તમામ દેશોનો મિત્ર છે અને તેની ભૂમિકા અત્યંત મહત્વની છે.

અમેરિકાએ ઈરાન પર આર્થિક પ્રતિબંધો લાદ્યા હોવા છતાં, ભારતને ચાબહાર બંદર માટે ખાસ "મંજૂરી મુક્તિ"આપી હતી. જોકે, આ છૂટની મુદત ૨૬ એપ્રિલ, ૨૦૨૬ ના રોજ સમાપ્ત થઈ ગઈ છે. ત્યારથી ભારત આ પ્રોજેક્ટ સાથે આગળ વધવા અંગે સાવચેતીભર્યું વલણ અપનાવી રહ્યું છે. આ જ કારણ છે કે મોદી સરકારે આ વર્ષના બજેટમાં ચાબહાર માટે કોઈ સીધી ફાળવણી કરી નથી.

ચાબહાર બંદર ભારત માટે મધ્ય એશિયા અને યુરોપ સુધી પહોંચવા માટેનું 'સુવર્ણ પ્રવેશદ્વાર' છે. આ માર્ગ દ્વારા ભારત પાકિસ્તાનને બાયપાસ કરી સીધું અફઘાનિસ્તાન અને કાકેશસ ક્ષેત્ર સાથે જોડાઈ શકે છે. વિદેશ મંત્રાલયના જણાવ્યા અનુસાર, ભારત એક 'પ્લાન-બી' પર કામ કરી રહ્યું છે, જેમાં પ્રતિબંધો દરમિયાન ચાબહારનો હિસ્સો કામચલાઉ ધોરણે ઈરાની સ્થાનિક કંપનીને ટ્રાન્સફર કરી શકાય છે.

અરાઘચીએ ઈરાન-અમેરિકા સંઘર્ષમાં કોઈ પક્ષ ન લેવા બદલ ભારતની પ્રશંસા કરી હતી. તેમણે ટ્રમ્પ વહીવટને શાંતિ માટે અવરોધ ગણાવતા કહ્યું કે, ઈરાન ક્યારેય દબાણ સામે ઝૂકશે નહીં. ભારતે અત્યાર સુધી શાહિદ બેહેશ્તી ટર્મિનલ માટે ૧૦ વર્ષનો કરાર કર્યો છે અને લગભગ ₹૧૦ અબજ (US$120 Million) નું રોકાણ કર્યું છે, જે ચીનના પ્રભાવને રોકવા માટે પણ વ્યૂહાત્મક રીતે મહત્વનું છે.