નવી દિલ્હી :મધ્ય પૂર્વમાં વધતા તણાવ વચ્ચે, ઈરાને હોર્મુઝ સ્ટ્રેટમાંથી પસાર થતા જહાજો પર ટ્રાન્ઝિટ ટોલ વસૂલવાનું શરૂ કરીને એક વ્યૂહાત્મક પગલું ભર્યું છે. ઈરાનનો દાવો છે કે આ ટોલ માટે પ્રથમ ચુકવણી રોકડમાં પ્રાપ્ત થઈ છે અને ઈરાનની સેન્ટ્રલ બેંકમાં જમા કરવામાં આવી છે

ઈરાનના રાજ્ય મીડિયા પ્રેસ ટીવી અનુસાર, રકમ રોકડમાં પ્રાપ્ત થઈ હતી અને સત્તાવાર ખાતાઓમાં જમા કરવામાં આવી હતી. અગાઉ એવી અટકળો હતી કે ઈરાન બિટકોઈન અથવા અન્ય ક્રિપ્ટોકરન્સીમાં આ ચુકવણી સ્વીકારી શકે છે તે હવે ફગાવી દેવામાં આવી છે

દરમિયાન, ઈરાની સંસદના ડેપ્યુટી સ્પીકર હમીદરઝા હાજીબાબેઈએ પુષ્ટિ આપી હતી કે હોર્મુઝ સ્ટ્રેટમાંથી પ્રથમ રકમ પહેલાથી જ સેન્ટ્રલ બેંકમાં જમા થઈ ગઈ છે. તેમણે એક જાહેર સભામાં જણાવ્યું હતું કે હોર્મુઝ સ્ટ્રેટ ફક્ત ઈરાની લોકોનું છે અને આ માર્ગ પરથી પસાર થતા તમામ જહાજોએ ઈરાની રિયાલમાં ટોલ ચૂકવવો પડશે

હાજીબાબેઈએ ચેતવણી પણ આપી હતી કે જો યુનાઇટેડ સ્ટેટ્સ તેની આક્રમક નીતિઓ ચાલુ રાખશે, તો ઈરાન આ માર્ગ દ્વારા જહાજોની અવરજવરને પ્રતિબંધિત કરી શકે છે. તેમણે જણાવ્યું હતું કે નિયમોનું ઉલ્લંઘન કરતા બે જહાજો પહેલાથી જ પકડાઈ ગયા છે અને જો જરૂરી હોય તો વધુ કડક કાર્યવાહી કરવામાં આવશે.

તેમણે એવો પણ દાવો કર્યો હતો કે ઈરાનની લશ્કરી તાકાતે યુએસ યુદ્ધ જહાજોને 200 કિલોમીટર પાછળ હટવાની ફરજ પાડી છે. આ પગલું વૈશ્વિક વેપાર અને તેલ પુરવઠા માટે મહત્વપૂર્ણ માનવામાં આવે છે, કારણ કે હોર્મુઝ સ્ટ્રેટ વિશ્વના સૌથી વ્યસ્ત દરિયાઈ માર્ગોમાંનો એક છે.