તેહરાન: મધ્ય પૂર્વમાં ચાલી રહેલા સંઘર્ષે હવે એક અત્યંત અસામાન્ય અને ડરામણું વળાંક લીધો છે. હોર્મુઝની સામુદ્રધુનીમાં અમેરિકા દ્વારા લાદવામાં આવેલા આર્થિક પ્રતિબંધો અને સૈન્ય ઘેરાબંધીથી અકળાયેલું ઈરાન હવે અમેરિકી યુદ્ધ જહાજો પર હુમલો કરવા માટે તાલીમબદ્ધ 'કામિકાઝે ડોલ્ફિન' (Kamikaze Dolphins) નો ઉપયોગ કરવાનું વિચારી રહ્યું છે. આ સમાચાર બહાર આવતા જ વૈશ્વિક રક્ષણ નિષ્ણાતોમાં ચિંતાની લહેર દોડી ગઈ છે.
શું છે આ 'કામિકાઝે ડોલ્ફિન' પ્રોજેક્ટ?
અહેવાલો મુજબ, ઈરાન પાસે એવી ડોલ્ફિન છે જેમના શરીર પર શક્તિશાળી વિસ્ફોટકો અને માઈન્સ (Mines) લગાવવામાં આવ્યા છે. આ ડોલ્ફિનને એવી તાલીમ આપવામાં આવી છે કે તે દુશ્મન જહાજોની ઓળખ કરી તેની સાથે અથડાઈને આત્મઘાતી વિસ્ફોટ કરી શકે. વોલ સ્ટ્રીટ જર્નલના રિપોર્ટ અનુસાર, ઈરાની અધિકારીઓ હવે આ અપ્રગટ હથિયારનો ઉપયોગ કરીને અમેરિકાના નેવલ ફ્લીટને નિશાન બનાવવાની હિમાયત કરી રહ્યા છે.
સોવિયત યુનિયન સાથે જોડાયેલા છે તાર
આ કોઈ નવી વાત નથી. ઈરાને વર્ષ ૨૦૦૦માં ભૂતપૂર્વ સોવિયત યુનિયન પાસેથી આવી તાલીમબદ્ધ ડોલ્ફિન ખરીદી હતી. રશિયા દ્વારા આ ડોલ્ફિન્સને હાર્પૂન (દરિયાઈ ભાલા) ચલાવવા અને જહાજો નીચે માઈન્સ ગોઠવવા માટે તાલીમ આપવામાં આવી હતી. હવે જ્યારે ઈરાનની અર્થવ્યવસ્થા તેલ નિકાસ અટકી જવાને કારણે ભાંગી પડી છે, ત્યારે તેહરાન આ આખરી હથિયાર અજમાવી શકે છે.
ઇન્ટરનેટ અને ફોન કેબલ્સ પણ જોખમમાં
માત્ર ડોલ્ફિન જ નહીં, પણ ઈરાની રિવોલ્યુશનરી ગાર્ડ (IRGC) એ હોર્મુઝમાંથી પસાર થતા આંતરરાષ્ટ્રીય ટેલિફોન અને ઇન્ટરનેટ કેબલ્સ કાપી નાખવાની પણ ધમકી આપી છે. જો આવું થાય, તો વિશ્વભરના સંચાર સાધનો ઠપ થઈ શકે છે અને ગ્લોબલ ઇન્ટરનેટ નેટવર્ક પર મોટી આફત આવી શકે છે.
યુદ્ધ તરફ આગળ વધતી સ્થિતિ
નિષ્ણાતોનું માનવું છે કે ઈરાન હવે અમેરિકાની આર્થિક નાકાબંધીને 'યુદ્ધ' સમાન ગણી રહ્યું છે. તેમના મતે, પ્રતિબંધો સહન કરવા કરતા સીધો સંઘર્ષ કરવો તેમને ઓછો નુકસાનકારક લાગે છે. દરિયાની નીચે ડોલ્ફિન અને સબમરીન દ્વારા હુમલાની આ યોજના વિશ્વ માટે એક નવા જ પ્રકારના 'બાયોલોજિકલ વોરફેર' (જૈવિક યુદ્ધ) તરફ ઈશારો કરી રહી છે.