તેહરાન: અમેરિકા અને ઈરાન વચ્ચે ચાલી રહેલા ભારે તણાવ અને સંઘર્ષ વચ્ચે ઈરાને ૨૬૦ અમેરિકી ફાઇટર જેટ અને અત્યાધુનિક ડ્રોનને તોડી પાડ્યાનો દાવો કરીને સમગ્ર વિશ્વમાં ખળભળાટ મચાવી દીધો છે. ઇસ્લામિક રિવોલ્યુશનરી ગાર્ડ કોર્પ્સ (IRGC) ના પ્રવક્તા બ્રિગેડિયર જનરલ હુસૈન મોહબ્બીએ મેહર ન્યૂઝ એજન્સી મારફતે આ અંગેની વિગતો આપતા જણાવ્યું છે કે આ કાર્યવાહી દરમિયાન F-35, F-16, F-5, અને F-18 જેવા ઘાતક ફાઇટર જેટ તેમજ MQ-1, RQ-4, ઓર્બિટર અને લુકાસ ડ્રોનને નિશાન બનાવી તોડી પાડવામાં આવ્યા છે.

IRGC ના અધિકારીએ વધુમાં ઉમેર્યું હતું કે તેહરાને છેલ્લા બે અઠવાડિયામાં જ કોઈ પણ પ્રકારના નુકસાન વિના સાત MQM-170 રિકોનિસન્સ ડ્રોનને અટકાવી તોડી પાડ્યા છે, જે તેમની તકનીકી શ્રેષ્ઠતા સાબિત કરે છે. ઈરાની દળોએ પોતાની મિસાઈલ અને ડ્રોન ઉત્પાદન લાઈનોને ભૂગર્ભ સુવિધાઓમાં ખસેડી દીધી છે અને ઊંડા ભૂગર્ભ મિસાઈલ ઉત્પાદન શહેરો સ્થાપિત કર્યા છે. સ્થાનિક મીડિયા અહેવાલો મુજબ, ગલ્ફ સાથીઓ સાથેના તણાવ બાદ ઈરાને પોતાનું રાષ્ટ્રીય સંરક્ષણ નેટવર્ક અત્યંત મજબૂત બનાવ્યું છે અને તે હવે સંરક્ષણ સાધનોનું નિકાસકાર પણ બની ચૂક્યું છે.

બીજી તરફ, યુએસ પ્રમુખ ડોનાલ્ડ ટ્રમ્પે ઈરાનના આ દાવાઓ અને સંઘર્ષને ઓછો આંકતા ભારપૂર્વક જણાવ્યું છે કે આ પરિસ્થિતિને 'યુદ્ધ' ન કહી શકાય. ટ્રમ્પે નિવેદન આપ્યું હતું કે અમેરિકા ઈરાન સાથે ઘણી પ્રગતિ કરી રહ્યું છે અને પહેલા કરતા વધુ તેલ કાઢી રહ્યું છે. છેલ્લા પાંચ મહિનામાં કોઈ અમેરિકન સૈનિક ઘાયલ થયો નથી કે કોઈનું મૃત્યુ થયું નથી, તેથી તેને યુદ્ધ ગણાવવું અયોગ્ય છે. નોંધનીય છે કે અમેરિકાની મધ્યસત્ર ચૂંટણીમાં રિપબ્લિકન પાર્ટીની હાર બાદ ટ્રમ્પના વલણમાં થોડી નરમાઈ જોવા મળી રહી છે.

અમેરિકા અને ઈરાન વચ્ચેના આ વાકયુદ્ધ અને લશ્કરી દાવપેચથી પશ્ચિમ એશિયામાં યુદ્ધના વાદળો વધુ ઘેરાયા છે. ઈરાની સંરક્ષણ દળોએ ચેતવણી આપી છે કે જો બીજું યુદ્ધ ફાટી નીકળશે તો દુનિયા IRGC એરોસ્પેસ ફોર્સની અદ્યતન તાકાત જોઈને ચોંકી જશે. આગામી દિવસોમાં અમેરિકન સંરક્ષણ મંત્રાલય પેન્ટાગોન દ્વારા ઈરાનના આ દાવાઓ સામે શું સત્તાવાર સ્પષ્ટતા કે વળતો લશ્કરી જવાબ આપવામાં આવે છે તેના પર આંતરરાષ્ટ્રીય સમુદાયની નજર મંડાયેલી છે.