નવી દિલ્હી : આગામી ગણેશોત્સવ, નવરાત્રી, દિવાળી અને છઠ પૂજા જેવા મોટા તહેવારોમાં વતન જવા ઈચ્છતા મુસાફરો માટે ઈન્ડિયન રેલવે કેટરિંગ એન્ડ ટુરિઝમ કોર્પોરેશન (IRCTC) એ એક અગત્યનો અને ઐતિહાસિક રિપોર્ટ જાહેર કર્યો છે. તહેવારોની મોસમમાં વતન તરફ જતી ટ્રેનોમાં અભૂતપૂર્વ ધસારો જોવા મળી રહ્યો છે, જેના પરિણામે IRCTC એ સાતમી સપ્ટેમ્બરના રોજ એક જ દિવસમાં ૨૦.૦૬ લાખથી વધુ ટ્રેન ટિકિટોનું સફળતાપૂર્વક બુકિંગ કરીને નવો રેકોર્ડ સર્જ્યો છે. આ સિવાય એડવાન્સ રિઝર્વેશન પિરિયડ (ARP) ના બીજા દિવસે પણ ૧૯.૫૦ લાખથી વધુ ટિકિટો બુક થઈ હતી.

આઈઆરસીટીસીના અધિકારીઓ મુજબ, તહેવારોના દિવસોમાં કન્ફર્મ ટિકિટ મેળવવા માટે સવારના ૮:૦૦ થી ૮:૧૫ વાગ્યા સુધીનો સમય સૌથી નિર્ણાયક હોય છે. ટિકિટ વિન્ડો ખૂલતાની સાથે જ પ્રથમ ૧૫ મિનિટમાં સૌથી વધુ ટ્રાફિક રહે છે અને સવારે ૮ થી ૯ વાગ્યાના એક કલાકમાં જ કુલ બુકિંગના આશરે ૮.૪૩% થી ૧૪.૧૪% હિસ્સો બુક થઈ જાય છે. તહેવારોના ધસારાને પહોંચી વળવા માટે સર્વરની ક્ષમતા બમણી કરવામાં આવી છે અને જુલાઈ ૨૦૨૬ માં 'NGet' પ્લેટફોર્મને નવી મોર્ડન ગ્લાસમોર્ફિઝ્મ ડિઝાઈન સાથે અપગ્રેડ કરવામાં આવ્યું છે, જેનાથી એક જ સ્ક્રીન પર તમામ ક્લાસની સીટો જોઈ શકાય છે.

આ ઉપરાંત, સામાન્ય નાગરિકોને કન્ફર્મ ટિકિટ મળી રહે તે માટે આઈઆરસીટીસીએ કડક સુરક્ષા સિસ્ટમ લાગુ કરી છે. સિસ્ટમનો દુરુપયોગ રોકવા માટે અત્યાર સુધીમાં ૩ કરોડથી વધુ શંકાસ્પદ યુઝર આઈડી ડિએક્ટિવેટ કરવામાં આવ્યા છે અને ૧૬,૦૦૦ થી વધુ ગેરકાયદેસર ઈમેલ ડોમેનને બ્લોક કરી બોટ ટ્રાફિકમાં ૬૫% નો ઘટાડો કરાયો છે. સાથોસાથ સવારે ૮:૦૦ થી ૮:૧૦ વાગ્યા સુધી અધિકૃત ટિકિટ એજન્ટો માટે બુકિંગ પર પ્રતિબંધ મુકવામાં આવ્યો છે જેથી સામાન્ય મુસાફરો આધાર-ઓથેન્ટિકેટેડ આઈડી દ્વારા સીધી કન્ફર્મ ટિકિટ બુક કરી શકે.