તેલ અવીવ : મધ્ય-પૂર્વમાં ભલે સીઝફાયરની વાતો ચાલતી હોય, પરંતુ શાંતિના કોઈ એંધાણ દેખાઈ રહ્યા નથી. ઈઝરાયેલના વડાપ્રધાન બેન્જામિન નેતન્યાહુએ ઈરાનના પરમાણુ કાર્યક્રમ અંગે એક અસાધારણ અને ભયાનક ખુલાસો કરીને દુનિયાને સ્તબ્ધ કરી દીધી છે. નેતન્યાહુએ સ્પષ્ટ ચેતવણી આપી છે કે ઈરાનનો પરમાણુ ખતરો માત્ર ઈઝરાયેલ માટે જ નહીં, પણ સમગ્ર વિશ્વના અસ્તિત્વ માટે જોખમરૂપ છે.
 
૪૪૦ કિલોગ્રામ યુરેનિયમ: પરમાણુ બોમ્બનું કાઉન્ટડાઉન?
એક તાજેતરના ઈન્ટરવ્યુમાં નેતન્યાહુએ અત્યંત ચોંકાવનારો આંકડો રજૂ કરતા જણાવ્યું કે, ઈરાન પાસે હાલમાં ૪૪૦ કિલોગ્રામ જેટલું ૬૦% શુદ્ધ યુરેનિયમ ઉપલબ્ધ છે. સંરક્ષણ નિષ્ણાતોના મતે, આટલો જથ્થો પરમાણુ શસ્ત્રો બનાવવા માટે પૂરતો છે. ઈઝરાયેલના પીએમે ભારપૂર્વક કહ્યું કે, યુદ્ધવિરામ એ જોખમનો અંત નથી પરંતુ એક મોટા પડકારની શરૂઆત છે.
 
'કોઈની મદદ વગર ઈરાન પર ત્રાટકીશું'
ઈઝરાયેલની આક્રમક સુરક્ષા નીતિનો પુનરોચ્ચાર કરતા નેતન્યાહુએ કહ્યું, "જો જરૂર પડશે તો ઈઝરાયેલ કોઈ પણ દેશની મદદ વગર એકલે હાથે ઈરાન પર સૈન્ય કાર્યવાહી કરતા ખચકાશે નહીં." આ નિવેદન ખાસ કરીને અમેરિકામાં સત્તા પરિવર્તન અને ટ્રમ્પ વહીવટીતંત્રના આગમન પહેલા ઘણું મહત્વનું માનવામાં આવે છે. ઈઝરાયેલની બાઝ નજર ઈરાનની દરેક હિલચાલ પર છે અને તેઓ કોઈ પણ સંજોગોમાં ઈરાનને પરમાણુ શક્તિ બનવા દેવા માંગતા નથી.
 
વૈશ્વિક બજારો અને સુરક્ષા પર ખતરો
નેતન્યાહુના આ કડક વલણથી આંતરરાષ્ટ્રીય સ્તરે રાજકીય ગરમાવો આવી ગયો છે. રશિયા-યુક્રેન યુદ્ધની સ્થિતિ વચ્ચે મધ્ય-પૂર્વમાં જો ફરી જંગ છેડાય, તો તેની સીધી અસર વૈશ્વિક તેલના ભાવ અને સુરક્ષા વ્યવસ્થા પર પડશે. ઈઝરાયેલની આ સુરક્ષા નીતિ પાછળનું મુખ્ય કારણ પોતાના નાગરિકોનું રક્ષણ અને ઈરાનને કાયમી ધોરણે અંકુશમાં રાખવાનું છે. જો ઈરાન પોતાની ગતિવિધિઓ નહીં અટકાવે, તો આવનારા દિવસોમાં ખાડી દેશોમાં લોહિયાળ જંગના દ્રશ્યો ફરી જોવા મળી શકે છે.