હૈદરાબાદ:  દુનિયાના નકશા પર જ્યારે હોર્મુઝ સ્ટ્રેટ જેવા તેલના માર્ગો બંધ થવાની વાતો વહેતી થાય, ત્યારે તેની સીધી અસર ભારતના ગલી-કૂંચીમાં આવેલા પેટ્રોલ પંપો પર જોવા મળે છે. છેલ્લા 24 કલાકમાં આંધ્રપ્રદેશથી લઈને ગુજરાત સુધીના અનેક શહેરોમાં એવો નજારો જોવા મળ્યો જાણે મફતમાં તેલ વહેંચાઈ રહ્યું હોય! પશ્ચિમ બંગાળમાં ચૂંટણીના પડઘમ શાંત થતાની સાથે જ પેટ્રોલના ભાવ આભને આંબશે તેવી આશંકાએ લોકો ટાંકી ફૂલ કરાવવા દોડી રહ્યા છે. સ્થિતિ એવી સર્જાઈ કે અનેક જગ્યાએ 'સ્ટોક ખાલી છે'ના બોર્ડ લટકાવવા પડ્યા અને ટ્રાફિક જામના દ્રશ્યો સર્જાયા.

પેટ્રોલિયમ મંત્રાલયના સંયુક્ત સચિવ સુજાતા શર્માએ મંગળવારે પત્રકારો સાથેની વાતચીતમાં આ ગભરાટને શાંત કરવાનો પ્રયાસ કર્યો હતો. તેમણે સ્પષ્ટ કર્યું કે ભારત પાસે LPG, પેટ્રોલ અને ડીઝલનો પૂરતો સ્ટોક છે અને ભાવ વધારવાની હાલમાં કોઈ જ યોજના નથી. જોકે, પડદા પાછળની વાસ્તવિકતા એ છે કે આંતરરાષ્ટ્રીય બજારમાં ક્રૂડ ઓઈલ $114 પ્રતિ બેરલને વટાવી ચૂક્યું છે. રિટેલ કંપનીઓ દરરોજ ₹2,400 કરોડનું નુકસાન વેઠી રહી હોવાના અહેવાલોએ લોકોના મનમાં ફાળ પાડી છે કે આ 'સ્થિરતા' ક્યાં સુધી ટકશે?

સરકારે લોકોને 'પેનિક બાયિંગ' ન કરવા અને સત્તાવાર જાહેરાતો પર જ ભરોસો રાખવા વિનંતી કરી છે. ચાર વર્ષથી કિંમતોમાં કોઈ મોટો ફેરફાર ન કરીને સરકારે સામાન્ય જનતાને રાહત તો આપી છે, પરંતુ મધ્ય પૂર્વની કટોકટી હવે ભારતીય રસોડા અને વાહનો સુધી પહોંચી ગઈ હોય તેમ લાગે છે. અધિકારીઓનું કહેવું છે કે પુરવઠો સાતત્યપૂર્ણ રીતે જળવાઈ રહેશે અને જે પંપો પર તેલ ખૂટ્યું છે ત્યાં તાત્કાલિક અસરથી રિફિલિંગ કરવામાં આવી રહ્યું છે. હવે જોવાનું એ રહેશે કે વૈશ્વિક દબાણ સામે ભારત સરકાર ક્યાં સુધી ભાવ વધારાના બંધ તોડી રાખે છે.