ન્યૂ યોર્ક, તા. ૦૯: ગ્લોબલ વોર્મિંગ અને સતત બદલાતી આબોહવાના કારણે સમગ્ર માનવજાત માટે વિનાશની ઘંટડી વાગી રહી છે. તાજેતરના આંતરરાષ્ટ્રીય આબોહવા સંશોધન (Climate Research) અહેવાલમાં આશંકા વ્યક્ત કરવામાં આવી છે કે આજથી બરાબર ૧૦૦ વર્ષ બાદ, એટલે કે વર્ષ ૨૧૨૫ સુધીમાં પૃથ્વીનું ભૌગોલિક સ્વરૂપ સંપૂર્ણપણે બદલાઈ જશે. ધ્રુવીય પ્રદેશોના બરફ અને ગ્લેશિયર્સ ઝડપથી પીગળવાને કારણે સમુદ્રની વધી રહેલી સપાટી ભવિષ્યમાં માનવ વસાહતોને ગળી જવા માટે તૈયાર થઈ રહી છે.

તાપમાનમાં ૪ ડિગ્રી સુધીનો જંગી વધારો થશે:

સંયુક્ત રાષ્ટ્રની આબોહવા સંસ્થા 'આઈપીસીસી' (IPCC)ના તાજેતરના અહેવાલ મુજબ, જો ગ્રીનહાઉસ ગેસો અને કાર્બન ઉત્સર્જન વર્તમાન ગતિએ જ ચાલુ રહેશે તો આગામી સદી સુધીમાં પૃથ્વીનું સરેરાશ તાપમાન ૨ થી ૪ ડિગ્રી સેલ્સિયસ વધી શકે છે. કેટલાક ક્લાઈમેટ મોડેલ તો ચેતવણી આપે છે કે જો સમયસર કડક પગલાં લેવામાં નહીં આવે તો સ્થિતિ આનાથી પણ વધુ ભયાનક અને કંટ્રોલ બહાર થઈ શકે છે.

દરિયાની સપાટી વધતાં વિશ્વના દિગ્ગજ શહેરો જળસમાધિ લેશે:

ગ્લેશિયર્સ અને ધ્રુવીય બરફ ઝડપથી ઓગળવાના કારણે વિશ્વના દરિયાકાંઠાના મોટા મહાનગરો કાયમી ધોરણે ડૂબી જવાનો ખતરો મંડાઈ રહ્યો છે. વર્ષ ૨૧૨૫ સુધીમાં ન્યૂયોર્ક, લંડન, ટોક્યો, બેંગકોક અને ભારતનું આર્થિક પાટનગર મુંબઈ જેવા દરિયાકાંઠાના નીચાણવાળા વિસ્તારો પાણીમાં ગરકાવ થઈ શકે છે. ખાસ કરીને એશિયાના દરિયાકાંઠાના વિસ્તારો સૌથી વધુ પ્રભાવિત થશે, જેના કારણે માનવ ઇતિહાસનું સૌથી મોટું 'ક્લાઈમેટ માઈગ્રેશન' (સ્થળાંતર) જોવા મળશે.

હવામાનમાં ભારે અસંતુલન અને ૨૫ ટકા પ્રજાતિઓ થશે લુપ્ત:

ભવિષ્યમાં ભયાનક હીટવેવ (લૂ) અને અસહ્ય ગરમીની ઘટનાઓ રોજિંદી બની જશે, જેનાથી પીવાના શુદ્ધ પાણીની તીવ્ર અછત અને ભયાનક દુષ્કાળ સર્જાશે. બીજી તરફ, વાદળ ફાટવા અને અતિવૃષ્ટિ જેવી આફતો સામાન્ય બની જશે. પર્યાવરણના આ અસંતુલનને કારણે પૃથ્વી પરની ૨૫ ટકા એટલે કે એકચતુર્થાંશ વનસ્પતિઓ અને જીવજંતુઓની પ્રજાતિઓ કાયમ માટે લુપ્ત થઈ જવાની ભયાનક આશંકા છે.

શું માનવજાત ટકી શકશે?

પર્યાવરણ નિષ્ણાતોના મતે ૧૦૦ વર્ષ પછી પણ માનવીનું અસ્તિત્વ તો રહેશે, પરંતુ જીવન જીવવું એ એક અત્યંત કઠિન લડાઈ બની જશે. શુદ્ધ હવા, અનાજ અને પીવાના પાણી માટે વિશ્વયુદ્ધ જેવી સ્થિતિ સર્જાશે. જો સમગ્ર વિશ્વ અત્યારથી જ કાર્બન ઉત્સર્જન ઘટાડવા અને પર્યાવરણ બચાવવા માટે ક્રાંતિકારી પગલાં નહીં ભરે, તો આ સંભવિત વિનાશને રોકવો અશક્ય બની જશે.