તેલ અવીવ: ઇઝરાયેલ ડિફેન્સ ફોર્સ (આઈડીએફ) એ દક્ષિણ લેબેનોન અને ગાઝા પટ્ટીમાં આતંકવાદી સંગઠનો સામે આક્રમક કાર્યવાહી તેજ કરી છે. ૫૫૧મી બ્રિગેડના જવાનોએ દક્ષિણ લેબેનોનમાં વાયુસેના, આર્ટિલરી અને ડ્રોનની મદદથી સંયુક્ત ઓપરેશન હાથ ધરીને હિઝબુલ્લાહના સાત આતંકવાદીઓને મોતને ઘાટ ઉતાર્યા છે. આ આતંકીઓ જમીનની અંદર બનાવેલી સુરંગોનો ઉપયોગ હથિયારો, મોર્ટાર અને દારૂગોળો છુપાવવા માટે કરતા હતા. 

બીજી તરફ, ગાઝા પટ્ટીમાં પણ ઇઝરાયેલી સેનાને મોટી સફળતા મળી છે. અહીં કરવામાં આવેલા એક સચોટ હવાઈ હુમલામાં ઇસ્લામિક જેહાદ સંગઠનનો ખતરનાક કમાન્ડર અહેમદ મુહમ્મદ અબુ હામિદ માર્યો ગયો છે. આ બેવડી કાર્યવાહીથી આતંકી સંગઠનોની કમર તૂટી ગઈ છે અને ઇઝરાયેલે સુરક્ષા મામલે કડક સંદેશ આપ્યો છે.

ઇઝરાયેલ અને આસપાસના વિસ્તારોમાં તણાવ સતત વધી રહ્યો છે. ઇઝરાયેલી સેના (આઈડીએફ) એ પોતાની સુરક્ષા અને આતંકવાદને નેસ્તનાબૂદ કરવા માટે બહુમુખી ઓપરેશન શરૂ કર્યા છે. 

તાજેતરના અહેવાલો અનુસાર, ઇઝરાયેલની વાયુસેના, આર્ટિલરી અને ડ્રોન દ્વારા દક્ષિણ લેબેનોનમાં એક સચોટ સંયુક્ત ઓપરેશન પાર પાડવામાં આવ્યું હતું, જેમાં આતંકીઓના ગુપ્ત અડ્ડાઓને જમીનદોસ્ત કરવામાં આવ્યા છે.

આ ઓપરેશનમાં ઇઝરાયેલની ૫૫૧મી બ્રિગેડના સૈનિકોએ સક્રિય ભાગ લીધો હતો. સેનાના જણાવ્યા મુજબ, હિઝબુલ્લાહના ઓપરેટિવ્સ અંડરગ્રાઉન્ડ ટનલ (ભોંયરા) નેટવર્કનો ઉપયોગ કરીને મોટા પાયે દારૂગોળો, મોર્ટાર અને અન્ય યુદ્ધ સામગ્રી સંગ્રહ કરી રહ્યા હતા. સેનાએ આ ગુપ્ત અડ્ડાઓ પર ત્રાટકીને એક સપ્તાહની અંદર હિઝબુલ્લાહના સાત આતંકીઓને ખતમ કરી દીધા છે અને તેમનો ઘાતક દારૂગોળો નષ્ટ કરી દીધો છે.

બીજી તરફ, ગાઝા પટ્ટીમાં પણ આતંકવાદ સામે 'ઝીરો ટોલરન્સ'ની નીતિ અપનાવતા ઇઝરાયેલે વધુ એક ઐતિહાસિક સફળતા મેળવી છે. આઈડીએફ દ્વારા સત્તાવાર જાહેરાત કરવામાં આવી છે કે ગાઝા પટ્ટીમાં કરવામાં આવેલી એક ખાસ સ્ટ્રાઇકમાં ઇસ્લામિક જેહાદ સંગઠનનો ટોચનો કમાન્ડર અહેમદ મુહમ્મદ અબુ હામિદ માર્યો ગયો છે. અહેમદ લાંબા સમયથી ઇઝરાયેલ વિરોધી ગતિવિધિઓમાં સક્રિય હતો.

આ બંને ઓપરેશન સ્પષ્ટપણે દર્શાવે છે કે ઇઝરાયેલ એકસાથે અનેક મોરચે દુશ્મનોનો ખાતમો બોલાવી રહ્યું છે. ઉત્તરમાં હિઝબુલ્લાહ અને દક્ષિણમાં ઇસ્લામિક જેહાદ બંને ઇઝરાયેલના નિશાના પર છે અને સેના કોઈપણ ભોગે પોતાના નાગરિકોની સુરક્ષા માટે કટિબદ્ધ છે.