વોશિંગ્‍ટન/તેલ અવીવ/બેરૂત,તા.૨: અમેરિકાના રાષ્ટ્રપતિ ડોનાલ્‍ડ ટ્રમ્‍પની ઇઝરાયેલના વડાપ્રધાન બેન્‍જામિન નેતન્‍યાહુ સાથેની વાતચીત બાદ મોટી કૂટનીતિક જીત મળી છે. લેબનોનના રાષ્ટ્રપતિ કાર્યાલયે પુષ્ટિ કરી છે કે હિઝબુલ્‍લાહ અને ઇઝરાયેલ પરસ્‍પર હુમલાઓ રોકવા સંમત થયા છે. કરાર મુજબ ઇઝરાયેલ બેરૂતના દક્ષિણ દહીયેહ વિસ્‍તારમાં હુમલાઓ બંધ કરશે અને હિઝબુલ્‍લાહ ઇઝરાયેલ પર હુમલાઓ અટકાવશે.

મધ્‍ય પૂર્વમાં છેલ્‍લા કેટલાક સમયથી ચાલી રહેલા ભયંકર લોહીયાળ જંગ વચ્‍ચે એક અત્‍યંત રાહતજનક અને મોટા સમાચાર સામે આવ્‍યા છે. અમેરિકાના રાષ્ટ્રપતિ ડોનાલ્‍ડ ટ્રમ્‍પની સીધી દખલગીરી અને કુનેહપૂર્ણ મધ્‍યસ્‍થી આખરે રંગ લાવી છે. ઇઝરાયેલ અને લેબનોનના કટ્ટરપંથી સંગઠન હિઝબુલ્‍લાહ વચ્‍ચે પરસ્‍પર હુમલાઓ રોકવા માટે એક ઐતિહાસિક સહમતિ સધાઈ ગઈ છે.

પ્રાપ્ત સત્તાવાર અહેવાલો અને લેબનોનના રાષ્ટ્રપતિ કાર્યાલયના સત્તાવાર નિવેદન અનુસાર, લેબનોનના અધિકારીઓને હિઝબુલ્‍લાહ તરફથી ઇઝરાયેલ પરના તમામ પ્રકારના હુમલાઓ તાત્‍કાલિક અસરથી રોકી દેવાની પાકી ખાતરી મળી ચૂકી છે. આ મોટી અને ધમાકેદાર જાહેરાત અમેરિકી રાષ્ટ્રપતિ ડોનાલ્‍ડ ટ્રમ્‍પની તે મહત્‍વપૂર્ણ ઘોષણા બાદ કરવામાં આવી છે, જેમાં તેમણે જણાવ્‍યું હતું કે ઇઝરાયેલના વડાપ્રધાન બેન્‍જામિન નેતન્‍યાહુ સાથેની તેમની તાજેતરની ટેલિફોનિક વાતચીત દરમિયાન વડાપ્રધાન નેતન્‍યાહુ પણ હુમલાઓ રોકવા માટે રાજી થઈ ગયા છે.

આ અમેરિકન-મધ્‍યસ્‍થી પ્રસ્‍તાવ (ડીલ) હેઠળ કેટલીક અત્‍યંત મહત્‍વપૂર્ણ શરતો નક્કી કરવામાં આવી છે. જે મુજબ, ઇઝરાયેલની સેના હવે લેબનોનની રાજધાની બેરૂતના દક્ષિણ ભાગમાં આવેલા ‘દહીયેહ' વિસ્‍તારમાં પોતાના હવાઈ અને અન્‍ય સૈન્‍ય હુમલાઓ સંપૂર્ણપણે બંધ કરશે. તેની સામે, હિઝબુલ્‍લાહ દ્વારા ઇઝરાયેલના નિર્દોષ નાગરિકો અને સૈન્‍ય પર કરવામાં આવતા ઘાતક રોકેટ અને મિસાઈલ હુમલાઓ પર પણ તત્‍કાળ પૂર્ણવિરામ મુકવામાં આવશે.

અત્રે નોંધનીય છે કે, જોકે છેલ્‍લા કેટલાક અઠવાડિયાથી ઇઝરાયેલે બેરૂત પર હુમલાઓનું પ્રમાણ નહિવત કરી દીધું હતું, પરંતુ આ સત્તાવાર યુદ્ધવિરામ કરારથી સમગ્ર મધ્‍ય પૂર્વમાં ફેલાયેલી યુદ્ધની ભયાનક આગ શાંત થવાની પ્રબળ આશા જાગી છે.

વિશ્વભરના મીડિયા પ્‍લેટફોર્મ્‍સ અને રાજદ્વારી વર્તુળોમાં આ કરારને ડોનાલ્‍ડ ટ્રમ્‍પની એક બહુ મોટી અને નિર્ણાયક વિદેશ નીતિની સફળતા તરીકે જોવામાં આવી રહી છે.