બેંગલુરુ : ભારતીય અવકાશ સંશોધન ક્ષેત્રે કારકિર્દી બનાવવા માંગતા યુવા એન્જિનિયરો અને ડિપ્લોમા હોલ્ડર્સ માટે ખુશખબર છે! ભારતીય અવકાશ સંશોધન સંગઠન (ISRO) ના યુ આર રાવ સેટેલાઇટ સેન્ટર (URSC) દ્વારા વર્ષ ૨૦૨૬-૨૭ ના સત્ર માટે ૪૧૦ એપ્રેન્ટિસની જગ્યાઓ માટે ઓનલાઇન અરજીઓ આમંત્રિત કરવામાં આવી છે. દેશની સર્વોચ્ચ સ્પેસ એજન્સી સાથે જોડાઈને પ્રેક્ટિકલ નોલેજ અને સ્ટાઇપેન્ડ મેળવવાની આ એક શાનદાર તક છે.

કોણ અરજી કરી શકે? (પાત્રતા અને ખાલી જગ્યાઓ)

આ ભરતી ડ્રાઇવ હેઠળ મુખ્યત્વે ત્રણ કેટેગરીમાં જગ્યાઓ બહાર પાડવામાં આવી છે. ખાસ વાત એ છે કે જે વિદ્યાર્થીઓએ વર્ષ ૨૦૨૨ થી ૨૦૨૬ ની વચ્ચે તેમની ડિગ્રી કે ડિપ્લોમા પૂર્ણ કર્યો હોય, માત્ર તેઓ જ આ માટે અરજી કરી શકશે.

· ગ્રેજ્યુએટ એપ્રેન્ટિસ (૨૨૦ જગ્યાઓ): ઉમેદવાર માન્ય યુનિવર્સિટીમાંથી સંબંધિત વિષય (જેમ કે કમ્પ્યુટર સાયન્સ, ઇલેક્ટ્રોનિક્સ, મિકેનિકલ, એરોસ્પેસ વગેરે) માં B.E. અથવા B.Tech પાસ હોવો જરૂરી છે.

· ટેકનિશિયન એપ્રેન્ટિસ (૧૨૦ જગ્યાઓ): સંબંધિત એન્જિનિયરિંગ બ્રાન્ચમાં રાજ્ય બોર્ડ દ્વારા માન્ય ડિપ્લોમા જરૂરી.

· કોમર્શિયલ પ્રેક્ટિસ એપ્રેન્ટિસ (૭૦ જગ્યાઓ): કોમર્શિયલ પ્રેક્ટિસમાં ડિપ્લોમા હોવો ફરજિયાત.

(નોંધ: જેઓ ૨૦૨૧ પહેલા પાસ થયા છે, હાલ ઉચ્ચ અભ્યાસ કરી રહ્યા છે, અથવા પહેલેથી જ ૧ વર્ષનો અનુભવ ધરાવે છે તેઓ આ ભરતી માટે અપાત્ર ગણાશે.)

આ રીતે કરો ઓનલાઇન અરજી (છેલ્લી તારીખ: ૨૮ ઓગસ્ટ)

ઇચ્છુક ઉમેદવારો ૨૮ ઓગસ્ટ, ૨૦૨૬ (રાત્રે ૧૧:૫૯ કલાક) સુધીમાં પોતાની અરજી સબમિટ કરી શકે છે.

1.      સૌથી પહેલાં રાષ્ટ્રીય એપ્રેન્ટિસશીપ તાલીમ યોજના (NATS) પોર્ટલ પર જઈને પોતાનું રજિસ્ટ્રેશન કરાવી નોંધણી નંબર મેળવવો.

2.      ત્યારબાદ, UMANG (ઉમંગ) પોર્ટલ પર લોગ-ઇન કરી "URSC એપ્રેન્ટિસશીપ" સર્ચ કરવું.

3.      ત્યાં ફોર્મ ભરીને, જરૂરી દસ્તાવેજો અપલોડ કરી ઓનલાઇન અરજી સબમિટ કરવી.

સ્ટાઇપેન્ડ અને પસંદગી પ્રક્રિયા

પસંદ કરાયેલા ઉમેદવારોને એપ્રેન્ટિસ એક્ટ ૧૯૬૧ હેઠળ ૧૨ મહિનાની સઘન તાલીમ આપવામાં આવશે. તાલીમ દરમિયાન ગ્રેજ્યુએટ એપ્રેન્ટિસને દર મહિને ₹૧૨,૩૦૦ જ્યારે ટેકનિશિયન અને કોમર્શિયલ પ્રેક્ટિસ એપ્રેન્ટિસને ₹૧૦,૯૦૦ નું સ્ટાઇપેન્ડ ચૂકવવામાં આવશે.

ઉમેદવારોની પસંદગી માટે કોઈ અલગ લેખિત પરીક્ષા લેવાશે નહીં. લાયકાત પરીક્ષા (ડિગ્રી/ડિપ્લોમા) માં મેળવેલા ગુણના આધારે મેરિટ લિસ્ટ તૈયાર કરી ઉમેદવારોને શોર્ટલિસ્ટ કરવામાં આવશે. જોકે, સ્પષ્ટતા કરવામાં આવી છે કે આ એપ્રેન્ટિસશીપ પૂર્ણ કર્યા બાદ ઇસરોમાં કાયમી નોકરીની કોઈ ખાતરી આપવામાં આવતી નથી.