ચેન્નાઈ : તમિલનાડુ સરકારે ઇસ્લામ ધર્મ અંગીકાર કરનારા વ્યક્તિઓને પછાત વર્ગ (મુસ્લિમ) હેઠળ અનામતના લાભ આપવાના મુદ્દે મદ્રાસ હાઈકોર્ટના તાજેતરના ચુકાદાને સુપ્રીમ કોર્ટમાં પડકાર્યો છે. રાજ્ય સરકારે સ્પેશિયલ લીવ પિટિશન (SLP) દાખલ કરીને હાઈકોર્ટના જૂન ૨૦૨૬ના તે ચુકાદાને રદ કરવાની માંગ કરી છે, જેમાં ૯ માર્ચ, ૨૦૨૪ના રોજ જારી કરાયેલા સરકારી આદેશને ગેરબંધારણીય જાહેર કરવામાં આવ્યો હતો.

​આ સમગ્ર વિવાદની શરૂઆત ત્યારે થઈ જ્યારે થૂથુકુડી જિલ્લાના એક વ્યક્તિ, જેણે ૨૦૧૫માં હિંદુ ધર્મમાંથી ઇસ્લામ સ્વીકાર્યો હતો, તેણે ‘મુસ્લિમ લબ્બાઈ’ સમુદાયના પ્રમાણપત્ર માટે અરજી કરી હતી. રેવન્યુ અધિકારીઓએ અરજી નકારી કાઢતા તેણે હાઈકોર્ટના દ્વાર ખખડાવ્યા હતા. આ દરમિયાન, તમિલનાડુ સરકારે માર્ચ ૨૦૨૪માં એક આદેશ બહાર પાડ્યો હતો, જે અંતર્ગત પછાત વર્ગ (BC), અત્યંત પછાત વર્ગ (MBC), વિમુક્ત જનજાતિ (DNC) અથવા અનુસૂચિત જાતિ (SC) માંથી ઇસ્લામમાં ધર્માંતરણ કરનારા વ્યક્તિઓને સાત સૂચિત મુસ્લિમ સમુદાયો પૈકી એકમાં ગણીને અનામતનો લાભ આપવાની જોગવાઈ કરવામાં આવી હતી.

​જોકે, મદ્રાસ હાઈકોર્ટની મદુરાઈ બેન્ચે આ આદેશને ફગાવી દેતા સ્પષ્ટ કર્યું હતું કે ધર્માંતરણ માત્રથી વ્યક્તિને કોઈ ચોક્કસ પછાત વર્ગની મુસ્લિમ સમુદાયનો દરજ્જો મળી શકતો નથી. કોર્ટે નોંધ્યું હતું કે આવી સમુદાયો જન્મ-આધારિત હોય છે. હાઈકોર્ટે કડક અવલોકન કરતા જણાવ્યું હતું કે, “ધર્માંતરણ બાદ વ્યક્તિ માત્ર એક મુસ્લિમ છે અને તે સિવાય બીજું કંઈ નથી.” કોર્ટે એમ પણ ઉમેર્યું હતું કે કારોબારી (સરકાર) કોઈ સરકારી આદેશ દ્વારા સ્થાપિત ન્યાયિક સિદ્ધાંતોને બદલી કે નકારી શકતી નથી.

​હવે સુપ્રીમ કોર્ટમાં દાખલ કરેલી અપીલમાં તમિલનાડુ સરકારે દલીલ કરી છે કે, આ સરકારી આદેશ પાછળનો મુખ્ય ઉદ્દેશ્ય સામાજિક અને શૈક્ષણિક પછાતપણું ભોગવતા લોકોના અનામતના અધિકારોનું રક્ષણ કરવાનો હતો. રાજ્ય સરકારના મતે, ધર્માંતરણ કરવાથી કોઈ વ્યક્તિનું સામાજિક પછાતપણું દૂર થઈ જતું નથી, તેથી તેમને અનામતના લાભોથી વંચિત ન રાખવા જોઈએ. રાજ્ય સરકારે આ આદેશ પાછળ ‘તમિલનાડુ બેકવર્ડ ક્લાસીસ કમિશન’ની ભલામણોનો હવાલો આપ્યો છે અને દલીલ કરી છે કે આ નિર્ણય સામાજિક સંતુલન જાળવવા માટે લેવામાં આવ્યો હતો.

​હવે દેશની સર્વોચ્ચ અદાલત આ મામલે શું વલણ અપનાવે છે અને ધર્માંતરણ બાદ અનામતના અધિકારો અંગે કયો નિર્ણય લેવાય છે, તેના પર સમગ્ર દેશની નજર ટકેલી છે.