જમ્‍મુ તા.૧૨: જમ્‍મુમાં રવિવારે કુદરતનો કહેર જોવા મળ્‍યો હતો. માત્ર ત્રણ કલાકમાં ૧૮૫.૬ મિમી એટલે કે ૭.૩૦ ઈંચ વરસાદ ખાબકતાં સમગ્ર શહેરમાં જળબંબાકારની સ્‍થિતિ સર્જાઈ હતી. ભારે વરસાદે ઓક્‍ટોબર મહિનામાં વરસાદનો ૭૧ વર્ષ જૂનો રેકોર્ડ તોડી નાખ્‍યો હતો. વર્ષ ૧૯૫૫માં નોંધાયેલા ૧૬૦ મિમી વરસાદનો રેકોર્ડ હવે તૂટી ગયો છે. ભારે વરસાદને કારણે રહેણાક વિસ્‍તારો અને રસ્‍તાઓ પાણીમાં ગરકાવ થઈ ગયા હતા, વાહનોને નુકસાન પહોંચ્‍યું હતું અને અનેક સ્‍થળોએ ભૂસ્‍ખલનની ઘટનાઓ બની હતી. આ કુદરતી આફતમાં એક મહિલા સહિત બે લોકોનાં મોત થયાં હોવાની માહિતી સામે આવી છે. ભારે વરસાદને કારણે જનજીવન ખોરવાઈ જતાં સ્‍થાનિક લોકોની મુશ્‍કેલીઓમાં પણ વધારો થયો હતો.

જમ્‍મુમાં રવિવારે સવારે ૮.૩૦ વાગ્‍યાથી શરૂ થયેલા ભારે વરસાદે થોડા જ સમયમાં વિકરાળ સ્‍વરૂપ ધારણ કર્યું હતું. માત્ર ત્રણ કલાકના ટૂંકા ગાળામાં ૧૮૫.૬ મિમી વરસાદ નોંધાયો હતો. આ આંકડો ઓક્‍ટોબર મહિનામાં નોંધાયેલા અગાઉના વરસાદના રેકોર્ડ કરતાં ઘણો વધારે છે. વર્ષ ૧૯૫૫માં ઓક્‍ટોબર મહિનામાં ૧૬૦ મિમી વરસાદ નોંધાયો હતો, જેનો રેકોર્ડ ૭૧ વર્ષ બાદ તૂટ્‍યો છે. આટલા ઓછા સમયમાં આટલો ભારે વરસાદ પડતાં શહેરની વરસાદી પાણીના નિકાલની વ્‍યવસ્‍થા પર પણ ભારે દબાણ સર્જાયું હતું. અનેક વિસ્‍તારોમાં પાણી ભરાઈ જતાં સામાન્‍ય જનજીવન અસ્‍તવ્‍યસ્‍ત થઈ ગયું હતું. રવિવારની સવારથી જ વરસાદનું જોર વધતાં રસ્‍તાઓ પર પાણી વહેવા લાગ્‍યાં હતાં અને સ્‍થાનિક લોકો માટે અવરજવર કરવી મુશ્‍કેલ બની હતી.

ભારે વરસાદને કારણે જમ્‍મુના અનેક રહેણાક વિસ્‍તારોમાં પાણી ભરાઈ ગયાં હતાં. રસ્‍તાઓ પર પાણીનો ભરાવો થતાં વાહનવ્‍યવહાર ખોરવાયો હતો અને વાહનચાલકોને ભારે મુશ્‍કેલીનો સામનો કરવો પડ્‍યો હતો. કેટલીક જગ્‍યાએ પાણી ભરાવાને કારણે વાહનોને નુકસાન થયું હતું. નીચાણવાળા વિસ્‍તારોમાં વરસાદી પાણી ફરી વળતાં સ્‍થાનિક લોકોની મુશ્‍કેલીઓમાં વધારો થયો હતો. શહેરના રસ્‍તાઓ પર પાણી ભરાઈ જવાથી રોજિદા કામકાજ અને અવરજવર પર અસર પડી હતી. આ ઉપરાંત, સતત વરસાદને કારણે અનેક સ્‍થળોએ ભૂસ્‍ખલનની ઘટનાઓ પણ બની હતી. ભારે વરસાદ અને ભૂસ્‍ખલનના કારણે પરિસ્‍થિતિ વધુ ગંભીર બની હતી. અચાનક સર્જાયેલી આ સ્‍થિતિએ શહેરના સામાન્‍ય જનજીવનને ઠપ કરી દીધું હતું અને લોકોને સલામત સ્‍થળે રહેવાની ફરજ પડી હતી