શ્રીનગર : જમ્મુ અને કાશ્મીર પ્રશાસને આરોગ્ય ક્ષેત્રે એક અત્યંત મહત્વપૂર્ણ અને મોટો નીતિગત નિર્ણય લીધો છે. જમ્મુ-કાશ્મીરના લેફ્ટનન્ટ ગવર્નર (LG) મનોજ સિંહાના વિશેષ આદેશ પર રાજ્યમાં રક્તપિત્ત એટલે કે લેપ્રસી (Leprosy) રોગને તાત્કાલિક અસરથી ‘નોંધનીય રોગ’ (Notifiable Disease) જાહેર કરવામાં આવ્યો છે. સરકારના આ કડક નિર્ણય બાદ સમગ્ર કેન્દ્રશાસિત પ્રદેશના મેડિકલ અને હેલ્થ કેર સેક્ટરમાં વહીવટી દોડધામ મચી ગઈ છે.
આકાશવાણી જમ્મુના સત્તાવાર સંવાદદાતાના અહેવાલ મુજબ, આ નવા સરકારી નિર્દેશ હેઠળ હવે જમ્મુ-કાશ્મીરની તમામ સરકારી હોસ્પિટલો, પ્રાથમિક આરોગ્ય કેન્દ્રો તેમજ તમામ ખાનગી હોસ્પિટલો અને ક્લિનિક્સ માટે એક કડક નિયમ બનાવવામાં આવ્યો છે. આ નિયમ મુજબ, જો કોઈપણ ડૉક્ટર કે આરોગ્ય કેન્દ્રમાં રક્તપિત્તનો એક પણ નવો કેસ નિદાન (Diagnose) થશે, તો તેની સત્તાવાર જાણ નિયુક્ત સરકારી આરોગ્ય અધિકારીઓને તાત્કાલિક અને ફરજિયાતપણે (Mandatory) કરવી પડશે. જો કોઈ આમાં બેદરકારી દાખવશે તો તેની સામે કાનૂની કાર્યવાહી પણ થઈ શકે છે.
કેમ લેવાયું આ કડક પગલું? વધુ સંક્રમણ અટકાવવાનો મોટો પ્લાન
સરકારના આ આક્રમક વલણ પાછળનો મુખ્ય હેતુ રાજ્યમાં આ ગંભીર રોગની દેખરેખ અને સર્વેલન્સ સિસ્ટમને વધુ મજબૂત બનાવવાનો છે. સમયસર કેસોની માહિતી મળવાથી દર્દીનું વહેલું નિદાન થઈ શકશે અને તેને તાત્કાલિક યોગ્ય તબીબી સારવાર પૂરી પાડી શકાશે. આનાથી સમાજમાં આ રોગનું વધુ સંક્રમણ (Transmission) ફેલાતું અટકાવી શકાશે.
આ નિર્ણયથી જમ્મુ-કાશ્મીર જ નહીં પરંતુ સમગ્ર દેશમાં સુધારેલી દેખરેખ, અસરકારક કેસ મેનેજમેન્ટ અને સંકલિત જાહેર આરોગ્ય હસ્તક્ષેપો દ્વારા વડાપ્રધાનના ‘રક્તપિત્ત મુક્ત ભારત’ ના રાષ્ટ્રીય ધ્યેયને પ્રાપ્ત કરવામાં એક મોટું અને નિર્ણાયક બળ મળશે તેવો અંદાજ સેવાઈ રહ્યો છે.